पाकिस्तानमा प्रतिबन्धित धार्मिक संस्थाहरुमाथि ब्यापक कारबाही

इस्लामावाद (एजेन्सी) । पाकिस्तान सरकारले पछिल्लो एक साता यता पाकिस्तानमा प्रतिबन्धित समूहहरुद्वारा सञ्चालित १ सय ८२ धार्मिक विद्यालयको सञ्चालन आफ्नो नियन्त्रणमा लिएको जनाएको छ ।
पाकिस्तानमा सञ्चालित धार्मिक विद्यालयहरुलाई सरकारले आफ्नो मातहतमा ल्याएको हो ।

बिहीबार पाकिस्तानको आन्तरिक मामिला मन्त्रालयले पत्रकार सम्मेलन गर्दै विद्यालयलाई आफ्नो नियन्त्रणमा लिनुका साथै अन्य १ सय २१ जनालाई पक्राउ गरिएको जनाएको छ ।

पाकिस्तानको पछिल्लो कदमलाई प्रतिबन्धित समूहविरुद्ध पाकिस्तानको सबैभन्दा तीब्र कारवाहीका रुपमा लिइएको छ । त्यसबाहेक पाकिस्तानले प्रतिबन्धित समूहहरुले सञ्चालन गरेका अस्पताल, एम्बुलेन्स, औषधिपसल तथा अन्य संस्था पनि आफ्नो मातहतमा ल्याएको जनाएको छ ।

भारत प्रशासित कश्मीरका पुलावामामा ४० जनाभन्दा धेरै अर्धसैनिकको ज्यान जानेगरी भएको आत्मघाती बम आक्रमणपछि पाकिस्तानलाई प्रतिबन्धित समूहविरुद्ध कारवाही गर्न चर्को दबाब रहेको बताइन्छ ।

यद्यपि पाकिस्तानले भने भारतको दबाबमा आएर प्रतिबन्धित समूहविरुद्ध पछिल्लो कारवाही गरिएको भन्ने टिप्पणीको खण्डन गरेको छ ।

पुलावामा आक्रमणको जिम्मा लिएको आतंकवादी समूह जैश–ए–मोहम्मदले पनि पाकिस्तानमा धार्मिक विद्यालयहरु सञ्चालन गर्दै आएको छ ।

त्यस्तै, कट्टर इस्लामिक मुलुक पाकिस्तानमा ठूलो सङ्ख्याका गरिब बालबालिकाहरु यस्ता प्रतिबन्धित समूहले सञ्चालन गर्ने विद्यालयमा अध्ययन गर्दै आएका छन् ।

यस्ता विद्यालयमा उग्र इस्लामिक शैलीको पाठ्यक्रम पढाइने गरेको बताइन्छ । प्रतिबन्धित समूहले सञ्चालन गरेका विद्यालयमा अध्ययन गरेका विद्यार्थीहरु पछि गएर विभिन्न उग्र इस्लामिक गतिविधिमा संलग्न समेत हुँदै आएका छन् ।

पाकिस्तानमा जमात उद दवालगायतका विभिन्न प्रतिबन्धित समूहहरुले मानवीय संस्थाका नामबाट विभिन्न अस्पताल, शिक्षालय तथा अन्य सेवाहरु चलाउँदै आएका छन् ।

जमात उद दवाको सम्बन्ध पाकिस्तानमा प्रतिबन्धित समूहको सूचीमा सूचिकृत लस्कर ए तैएबासँग रहेको बताइन्छ ।

यता जमात उद दवाले भने आफ्ना विद्यालय तथा अन्य विभिन्न मानवीय संस्थाविरुद्ध गरेको कारवाहीविरुद्ध अदालतमा मुद्दा दयार गर्ने जनाएको छ ।

Space for Ads 300px * 160px
© 2019 jaljalakhabar.com All right reserved Site By : SobizTrend Technology