व्यवसायिक अभिवृद्धिको योजना ल्याउँदै सरकार

काठमाडौं ।  उद्योग मन्त्रालयले आगामी बर्षको बजेटलाई ठोस रुप दिनका लागि व्यवसायिक अभिवृद्धि गर्ने लक्ष्यसहितका योजना अघि सार्ने तयारी गरेको छ ।

आगामी बर्षको बजेटमा सामाजिक उत्तरदायित्वका कार्यक्रम बढाउने, घरेलु तथा साना र मझौला उद्योगमा महिला उद्यमीको संख्या बढाउनका लागि अनुदानको व्यवस्था गर्ने लगायत कार्यक्रम अघि सार्ने तयारी मन्त्रालयले गरेको छ ।
त्यसैगरी १० बर्ष भित्र नेपाली युवालाई रोजगारीका लागि विदेश जानुपर्ने बाध्यताको अन्त्य गर्ने गरी कार्यक्रम केन्द्रिकृत गर्ने तयारी पनि मन्त्रालयले गरेको छ ।

औद्योगिक क्षेत्रको दीर्घकालिन विकासका लागि पुर्वाधारमा लगानी थप्नुपर्ने निष्कर्षका साथ मन्त्रालयले झण्डै साढे तीन अरब थप गर्नुपर्ने तथा च्यालेन्ज फण्डका लागि पनि आवश्यक रकम छुट्याउन अर्थमन्त्रालयलाई लेखी पठाउने भएको छ ।

मन्त्रालयमा आइतबार आयोजित बजेट तर्जुमा सम्बन्धी कार्यक्रममा मन्त्री नविन्द्रराज जोशीले दीर्घकालिन महत्व र सम्वृद्धिका लागि सहयोग पुग्ने कार्यक्रम र बजेटलाई मन्त्रालयले उच्च महत्व दिएको बताए ।

मन्त्रालयले बैदेशिक रोजगारीमा गएकालाई स्वदेश फर्काउन आकर्षक प्याकेज ल्याउने बारेमा पनि तयारी सुरु गरेको छ । त्यसैगरी, मन्त्रालयले नया उद्योगमा विद्युतीय सवारी साधन बनाउने, स्टिल, बहुमुल्य रत्न पत्थर तथा कृषिजन्य उद्योगलाई विशेष प्राथमिकतामा राख्दै उद्यमशिलताको विकासमा बजेटलाई केन्द्रीत गर्ने बताएको छ ।