पहिरोले अधिकांश ग्रामीण सडक अवरुद्ध

मेलम्ची, १४ साउन । सिन्धुपाल्चोकको अधिकांश ग्रामीण सडक वर्षासँगैको पहिरोका कारण अवरुद्ध भएको छ । सदरमुकाम जोड्ने मेलम्ची–नवलपुर–चौतारा सडक अविरल वर्षासँगै झ्याडी खोला नजिक आएको पहिरोको कारण दुई सातादेखि अवरुद्ध छ । त्यस्तै मेलम्ची–तिपेनी सडकखण्डको विभिन्न ठाउँमा पहिरो झरेका कारण गुन्सा, भोताङ जाने यात्रुले निकै समस्या झेल्नुपरेको स्थानीयबासिन्दा बताउँछन् ।

सडक अवरुद्ध हुँदा अत्यावश्यक तथा दैनिक उपभोग्य सामान खरिदका लागि घन्टौँ हिँड्नुपर्ने बाध्यता रहेको दुवाचौर क्यौरानीका स्थानीयबासिन्दा धुव्र गिरिले बताउनुभयो । मेलम्चीबाट बाँसखर्क हुँदै बरुवासम्म पुग्ने सडक बर्खामा सधैँ अवरुद्ध हुने गर्दछ जसका कारण बरुवाबासीलाई एक दिन लगाएर मेलम्ची बजारसम्म खाद्यान्न किन्न जानुपर्ने बाध्यता रहेको बासँखर्कका समाजसेवी पासाङ तामाङले बताउनुभयो ।

अरनिको राजमार्गअन्तर्गतको जम्बुमा भोटेकोसी नदीमा आएको बाढीले सडक कटान गरेकाले हालसम्म पनि सडक सञ्चालनमा आउन नसकेको इप्रका बाह्रबिसेका प्रहरी निरीक्षक राजु पाण्डेले बताउनुभयो । नदीले सडक कटान गरेपछि भत्किएको सडकखण्डमा ढुङ्गाको ग्याविन भर्ने कार्य भइरहेको र सडक सञ्चालन गर्न अझै केही महिना लाग्ने उहाँको भनाइ थियो ।

त्यस्तै वर्षाको कारण जुरेमा माथिबाट खस्ने लेदोले बेलाबेलामा सडक अवरुद्ध गर्ने गरेको छ । माथिबाट झरेको लेदो सडकमा जम्मा हुने हँुदा सवारी साधन फस्ने कारणले यातायात आवतजावतमा समस्या हुने गरेको छ ।

हेलम्बु यातायातअन्तर्गतको जिरो किलोदेखि मेलम्चीसम्मको सडकको अवस्था निकै दयनीय छ । सडकमा परेको खाल्डो र हिलोको कारण यातायात सञ्चालनमा निकै कठिनाइ भएको मेलम्ची नगरपालिका ज्यामिरेका युवा रोमन कार्कीले बताउनुभयो ।