जाँदा जादै ओली सरकारका मन्त्रीले भ्रमणमा डेढ करोड खर्चिए

नेकपा एमाले अध्यक्ष केपी शर्मा ओली नेतृत्वको सरकारका मन्त्री तथा उच्च सरकारी अधिकारीले विदेश भ्रमणका नाममा राज्य कोषको करोडौ रकम खर्च गरेका छन् । मन्त्री, राज्य मन्त्री तथा सरकारी कर्मचारीले विभिन्न मुलुकको भ्रमण गरेको खर्च अर्थ मन्त्रालयले सम्वन्धित मन्त्रालयलाई निकासा समेत गरिसकेको छ ।
अर्थले एक महिनामा करिव एक करोड ३० रुपैयाँ रकम भ्रमण खर्चका रुपमा निकासा गरेको हो । मन्त्री, राज्य मन्त्री र कर्मचारीको भ्रमणका गरेको खर्चवापत असारमा मात्र अर्थ मन्त्रालयले यो रकम दिएको हो । परराष्ट्र, जनसंख्या तथा वातावरण, पर्यटन, रक्षा लगायतका मन्त्रालयका नाममा अर्थले असारमा रकम निकासा गरेको जनाएको हो । विदेशका विभिन्न कार्यक्रमका लागि भ्रमणमा गएका मन्त्री तथा उच्च अधिकारीको भ्रमण खर्चका लागि यो रकम निकासा भएको मन्त्रालयले जनाएको छ । मन्त्रालयका अनुसार यो महिना भ्रमण खर्चवापत सवैभन्दा वढी रकम परराष्ट्र मन्त्रालयलाई निकासा गरेको छ । भ्रमणका लागि सवैभन्दा वढी खर्च गर्नेमा परराष्ट्र मन्त्री कमल थापा देखिएका छन् । परराष्ट्रमन्त्री कमल थापाको टोली इस्तानवुल कायोयोजनाको समिक्षा र इजरायल भ्रमणमा जाँदा मात्र ४२ लाख २१ हजार खर्च भएको भनि मन्त्रालयले रकम निकासा गरेको छ । यस्तै, थापा सहितको टोली अमेरिका भ्रमण जाँदा गरेको खर्च वापत १५ लाख २९ हजार रुपैयाँ परराष्ट्र मन्त्रालयलाई अर्थले उपलव्ध गराएको छ । यस्तै, अर्थ राज्यमन्त्री दामोदर भण्डारी सहितको टोली एडीवीको वैठकमा जाँदा १५ लाख ४६ हजार रुपैयाँ रकम खर्च गरेको छ । मन्त्रालयका अधिकारीले विभिन्न मुलुक जाँदा २६ लाख ५७ हजार रुपैयाँ खर्च गरेको मन्त्रालयले जनाएको छ । मन्त्रालयका अधिकारीले चीन, भुटान, कोरिया भ्रमणका क्रममा यो रकम खर्च गरेका हुन् । रक्षा मन्त्री भीम रावलको ३ सदस्यीय टोली अमेरिकाको न्युयोर्क जाँदा मात्र १२ लाख ५६ हजार रुपैयाँ खर्च गरेको छ । यहि महिना वाणिज्य सचिव सहितको टोलीले पनि भारत जाँदा ११ लाख ३४ हजार रुपैयाँ खर्च गरेको र यो रकम पनि अर्थले निकासा गरेको हो । वाणिज्य सचिव स्तरिय वैठकमा भारत जाँदा यो रकम खर्च भएको अर्थले जनाएको छ । यस्तै, पर्यटन, उद्योग लगायतका मन्त्री र अधिकारीले पनि लाखौ रकम भ्रमणमा खर्च गरेका छन् ।