संसदमा माधव नेपालको ‘मध्यमार्गी’ सम्बोधन

काठमाडौं, साउन ८ – पूर्व प्रधानमन्त्री एवं नेकपा एमालेका नेता माधवकुमार नेपाललाई मध्यस्थकर्ता गर्न सक्ने नेताको रुपमा चिनिन्छ । शनिबार व्यवस्थापिका संसदमा बोल्ने क्रममा पनि उहाँले आफ्नो यही भूमिका देखाउने प्रयास गर्नुभयो ।

शुक्रबारको बैठकमा एमालेका सुवासचन्द्र नेम्वाङ र शनिबारको बैठकमा कांग्रेसका रमेश लेखकले सुरुमा बोलेको प्रसँग निकाल्दै नेपालले भन्नुभयो, ‘शुक्रबारको छलफल पूर्वबाट सुरु भयो, शनिबार सुदूरपश्चिमबाट, म त मध्यक्षेत्रबाट प्रतिनिधि गर्ने सांसद हुँ, त्यसैले कसरी बोलौं भन्ने लागिरहेको छ ।’

राष्ट्रिय सहमतिको सरकार गठनको लागि आफूले पनि पहल गरेको भन्दै उहाँले अहिले नै अविश्वास प्रस्ताव दर्ता गर्ने बेला नभएको बताउनुभयो । ‘सहमतीय सरकार बन्न सक्थ्यो, बन्ने अवस्था थियो नै, तर माओवादी र कांग्रेसबाट हतार गर्ने काम भयो’ नेपालले भन्नुभयो ।

उहाँले सरकारले पनि आलोचना गर्नुभयो । प्रधानमन्त्री केपी ओलीलाई लक्षित गर्दै उहाँले सरकार संस्थागत रुपमा नभई गुटगत ढंगले चलेको टिप्पणी गर्नुभयो । सरकारलाई लक्षित गर्दै उहाँले कटाक्ष गर्दा कांग्रेस र माओवादीका सांसदहरु उत्साहित देखिन्थे ।

एउटा सरकारको प्रशंसा गर्दा अर्को सरकारले गरेको राम्रो कामलाई बिर्सन नहुनेमा जोड दिँदै नेता नेपालले आफ्नो पालामा पनि राम्रो काम भएको दावी गर्नुभयो । अहिलेको सरकारले पनि राम्रो काम गरेको भन्दै उहाँले राम्रो कामलाई राम्रो बन्न सक्नुपर्नेमा जोड दिनुभयो ।

सम्बोधनको क्रममा नेता नेपालले एकले अर्कोलाई आरोप प्रत्यारोपबाट भन्दा आपसमा सहमति गरेर अघि बढ्नुपर्नेमा जोड दिनुभयो ।