बालकमाथि पाँच लाख ऋण

काठमाडौं । सराङडाँडा ४ का भगीश्वर नेपाली १० वर्ष पुगे । दुर्गा उच्च माविको तीन कक्षाका विद्यार्थी उनीमाथि पाँच लाख ऋण छ ।

आमाको उपचारका लागि उनका लागि ठूलो बाबा खड्गबहादुरले जमानी बसेर त्यो ऋण लिइदिएका थिए ।

पहिल्यै बुवा गुमाइसकेका उनले पाँच लाख खर्च गरे पनि आमालाई बचाउन सकेनन् । वैदेशिक रोजगारीमा गएका बुबा रामबहादुर नेपालीले २५ पुस ०७१ मा मलेसियामै ज्यान गुमाए ।

घरमा श्रीमती बिरामी थिइन् । श्रीमतीको उपचारका लागि रामबहादुरले खर्च जम्मा गरेका थिए । त्यो खर्च घर पठाउने तयारी गर्दैगर्दा उनको पैसाकै लागि हत्या भएको थियो ।

श्रीमान्को हत्या भएको खबर आएपछि उनी थला नै परिन् । चेकजाँच गराउने क्रममा पत्ता लाग्यो उनको दुवै मृगौलाले काम गर्न छाडेछन् ।

विराटनगर हुँदै काठमाडौंसम्म लगेर उपचार गरिए पनि उनको ज्यान बचेन । अन्तत: २० माघ ०७२ मा उनले पनि धर्ती छाडिन् ।

आमा–बुवा दुवै गुमाएका भगीश्वरले अहिले ठूलो बाबा खड्गबहादुरकै घरमा संरक्षण पाइरहेका छन् ।

तर, भतिजोमाथि लागेको पाँच लाख ऋण कसरी तिर्ने भन्ने चिन्ताले सताइरहेको छ, खड्गबहादुरलाई ।

‘यो सानो बाबुलाई अहिले त मैले नै राखेको छु,’ खड्गबहादुरले भने, ‘आमाको उपचारमा लागेको ऋण तिरिदिने त हाम्रो पनि हैसियत छैन ।’ऋण कसरी तिर्ने भन्नेसँगै पढाइको चिन्ता पनि रहेको उनले बताए ।

उनले भने, ‘त्यस्तो कुनै सहयोगी हात पाइए भगीश्वरको जिन्दगी बन्थ्यो होला, मलाई त सधैँ उनकै चिन्ताले सताइरहन्छ ।