सल्यानका महिलाहरु तरकारी खेतीतर्फ आर्कषित

सल्यान । सल्यानका महिलाहरु तरकारी खेतीतर्फ आर्कषित हुन थालेका छन् । महिलाहरुले गाउँ गाउँमा समुह गठन गरेर तरकारी खेतीमा कृयासिलता बढाएका छन् ।

महिलाहरुलाई आयआर्जनको क्षेत्रमा अग्रसर बनाउने योजनाका साथ कृषि, स्वास्थ्य तथा वैकल्पिक जिविकोपार्जन प्रवद्र्धन कार्यक्रम पहलले गाउ गाउमा कृषि उत्पादन सम्वन्धी तालिम दिदै आएको छ ।
परम्परागत रुपमा तरकारी उत्पादन गर्दै आएका तर आवश्यक ज्ञान र सिप नहुँदा व्यबसायिक किसान बन्न नसकिरहेका महिलाहरु लक्षित गरेर समूह गठन गरिँदै आएको छ ।

पहल कार्यक्रमले सामूहिक रुपमा प्लाष्टिक घर दिएपछि सबैको नजर तरकारी खेतीतर्फ आकर्षित भएको प्रगतिशिल कृषक समूह दमाचौर ३ की अध्यक्ष प्रिति कुमारी चन्दले जानकारी दिइन् ।
यस्तै मुलखोला विउ उत्पादन कृषक समूह मैयानीकी अध्यक्ष कमला चन्दले पहलको कार्यक्रमले आफु र आफ्नो समूहलाई निकै परिवर्तन गराएको बताइन् ।

कृषि उत्पादनको विषयमा महिला किसानलाई चाहिने मौषमी तथा बेमौषमी विउ, प्राविधिक जानकारी, रोग किरा लागेमा तत्काल अपनाउनु पर्ने उपचार विधी र प्रकृया, तरकारी उत्पादनदेखी बजार व्यबस्थापनसम्मको सहयोग गर्दै आइरहेको पहल कार्यक्रम सल्यानका कार्यक्रम संयोजक दुर्गा पुनले जानकारी दिए ।

आर्थिक लेनदेनमा पुरुषको मात्र हात रहदा महिलाको काम मात्र गर्ने तर दुई चार पैसाको लागी पुरुष संगै हात फैलाउनु पर्ने परम्परागत समाजको संरचना बदल्नको लागी महिलाहरु लाई आर्थिक पक्षमा बलियो बनाउनको लागी आय आर्जनको लागि कार्यक्रम अघि बढाइएको पुनको भनाई रहेको छ ।