सुनिल बर्देवाको निधन

काठमाडौं । केही दिन अघि गायक खेमराज गुरुङको ज्यान लिने जण्डिसले अहिले अर्का गायक संगीतकार, एरेन्जर, गीतकार तथा गितारिस्ट सुनिल बर्देवाको ज्यान लिएको छ ।

मंगलबार दिउँसो एक्कासी रगत बान्ता गरेपछि उपचारका लागि त्रिभुवन शिक्षण अस्पताल लगिएका बर्देवाको उपचारको क्रममा निधन भएको हो ।

‘जब म निन्द्रामा सपनी तिम्रो, गोरेटो अनि उस्तै छ गल्ली, बिहानीमा अनि साँझमा लगायत थुप्रै गीतहरुबाट चर्चित रहेका बर्देवा आफ्नो समयका चर्चित पप गायक थिए । नयाँ एल्बमको तयारी गरिरहेका बर्देवाले ‘मेट्रिक्स’ नामक ब्याण्डबाट गायन यात्रा सुरु गरेका थिए ।

आफ्नो छुट्टै पहिचानका साथै अघिल्लो दशकका चर्चित गायकहरु जस्तै नविन के भट्टराई, निमा रुम्बा आदिका धेरै गीतहरु एरेन्ज पनि गरेका थिए ।

बर्देवा काठमाडौंका स्थायी बासिन्दा हुन् । उनकी श्रीमतीको पनि दुई वर्ष अघि निधन भएको थियो । उनका दुई सन्तानमध्ये छोरी सनुष्का बर्देवा चितवनमा डेन्टिस्ट अध्ययन गरिरहेकी छिन् भने छोरा सानै छन् ।

उनको मृत्यु पछि नेपाली सांगितिक जगतका थुप्रै कलाकारले उनीमाथि समवेदना व्यक्त गरेका छन् । हाल अमेरिकामा रहेका गायक तथा संगीतकार काली प्रसाद बास्कोटाले उनका कारण नेपाली पप संगीत उचाइमा रहेको बताएका छन् । उनले फेसबुकमा लेखेका छन्, ‘जतिबेला सुनिल बर्देवा सक्रिय हुनुहुन्थ्यो त्यतिबेला नेपाली पप संगीत सर्वाधिक उचाइमा थियो ।’

उनी थप लेख्छन्, ‘दाइले सायद मलामीबाहेक केही कमाउनुभएन । आत्माले शान्ति पाओस् ।’

यसका साथै टम्बलविडका गीतारिष्ट सरद श्रेष्ठले बर्देवाको मृत्यु भएको विश्वास नै गर्न नसकेको बताउँदै आत्माको चिर शान्तिको कामना गरेका छन् ।