बहुला कुकुरको टोकाइबाट दुईको मृत्यु, १५ घाइते

रोल्पा ।  बहुला कुकुरको टोकाईबाट रोल्पामा २ जनाको ज्यान गएको छ । पूर्वी रोल्पाको सिर्प –५, सिमगिठाका ५३ वर्षिय हीराबहादुर पुन र ६५ वर्षिय खरवीर पुनको मृत्यु भएको स्थानीय नेमबहादुर खड्काले जानकारी दिए । हीराबहादुर पुनको उपचारका लागि बुटवल लैजाँदै गर्दा मृत्यु भएको थियो भने खरवीर पुनको मंगलबार घरमै मृत्यु भएको हो ।

खड्काका अनुसार गत भाद्र ९ गते सिर्प –५, कै श्यामबहादुर पुनको कुकुर बहुलाएर सोही गाउँका १७ जना मानिस र ६ वटा पशुचौपायलाई टोकेको थियो ।
तर यतिधेरै क्षति भइसक्दा पनि उक्त घटनालाई प्रहरीमा समेत खबर नगरी गाउँमै घाइतेहरुको उपचार कुकुर मालिकले गर्ने शर्तमा मिलापत्र गरिएको थियो ।

यस्तो संवेदनशील विषयमा समेत गाउँमै मिलापत्र गर्नुले मानवीय क्षतिसम्मको दुखद् घटना व्यहोर्नुपरेको स्थानीय बताउँछन् । यसबारेमा जिल्ला पशु सेवा कार्यालय रोल्पाले भने आफूलाई कुनै जानकारी नै नभएको बताएको छ ।

जिल्ला पशु सेवा कार्यालय रोल्पाका पशु चिकित्सक निमबहादुर सिंहले यसबारेमा सोधखोज गर्दा दक्ष स्वास्थ्यकर्मीहरुबाट भ्याक्सिन सही तवरले नलगाईएको र पुरा डोज भ्याक्सिन समेत नलगाईएको कारणले यस्तो घटना घटेको बताए ।

र्याल काढनु, रिंगटा लाग्नु रेविजकै लक्षण भएकाले यसबारेमा गम्भीर हुनुपर्नेमा उनले जोड दिए । मंगलबार दिउसोमात्र आफूले यसबारेमा जानकारी पाएकाले जिल्ला पशुसेवा कार्यालय रोल्पाले तत्कालै सोही स्थानमा सम्पूर्ण कुराको जानकारी र सही उपचार दिने पशु चिकित्सक सिंहले बताए ।

घाइतेको अवस्था
कुकुरको टोकाईबाट घाइते १७ जनामध्ये २ जनाको ज्यान गइसकेको छ भने तीनजना गम्भिर अवस्थामा छन् । मृतकहरुकोझैं ती तीनजनाको पनि ¥याल काढ्ने, आङ सिल्किने लक्षण भएकोले अवस्था थप जटिल बन्नसक्ने स्थानीय नेमबहादुर खड्का बताउँछन् । ती गम्भीर प्रकृतिका तीनजना विरामीलाई बुधबार बिहान १० बजे सुलिचौर प्राथमिक स्वास्थ्य केन्द्रमा उपचारका लागि स्वास्थ्यकर्मीले बोलाएको बताइएको छ ।
केही घाइतेहरुले स्वास्थ्य केन्द्र सुलिचौरबाट भ्याक्सिन लगाएर समेत फर्किएको तर पुनः स्वास्थ्य संस्था ती विरामीहरु नफर्किएको स्वाथ्यचौकीले बताएको छ ।

बहुलाएको कुकुरलाई स्थानीयले मारेका छन् । विरामीहरुको स्वास्थ्यलाई ख्याल नगरी गाउँमै मिलाउनु गलत भएको जिल्ला प्रहरी कार्यालय रोल्पाका प्रमुख प्रहरी नायव उपरीक्षक रामप्रसाद घर्तीमगरले बताए ।
घटना भएको थाहा पाएलगत्तै प्रहरी पठाइएको र आवश्यक अनुसन्धान गरिने प्रहरी प्रमुख घर्तीमगरले बताए ।