ग्लोवल स्टुडेन्ट इन्टरप्रेन्यूर्स अवार्डका लागि आवेदन खुला

काठमाडौ  ।   यूवा उद्यमीहरुको एक संगठन इन्टरप्रेन्यूर्स अर्गनाइजेशन नेपाल शाखाले ग्लोवल स्टुडेन्ट इन्टरप्रेन्यूर्स अवार्ड नेपालका लागि आवेदन खुला गरेको छ । यो कार्यक्रम नेपाल उद्योग वाणिज्य महासंघमा रहेको युवा उद्यमी मञ्चसँगको सहकार्यमा हुन लागेको हो ।

यो स्नातक अध्ययन गरिरहेका यूवा उद्यमीहरुका लागि ल्याइएको कार्यक्रम हो । यसमा सहभागी युवा उद्यमीहरुले केही वर्षको अन्तरालमै हजारौको रोजगारी सृजना गर्नुका साथै निकै धेरै आम्दानी समेत गर्न सकेको जनाइएको छ ।

यसको अन्तिम घोषणा कार्यक्रम आगामी १५ डिसेम्बर २०१६ मा काठमाडौंमा हुने जनाइएको छ भने नेपालमा अवार्डका लागि फर्म वुझाउने अन्तिम म्याद १५ नोभेम्बर तोकिएको छ । प्रतिष्ठित कलेजबाट स्नातक अध्ययन गरिरहेका विद्यार्थीले कार्यक्रममा सहभागी हुन सक्ने छन् । साथै प्रारम्भमा विद्यार्थीहरु कम्तीमा ६ महिनादेखि कुनै आयमुलक उद्यममा सहभागी भएको हुनुपर्ने छ ।

आवेदन छनौट पछि चुनिएका विद्यार्थीहरुले उद्यमशीलता सम्बन्धी योजना प्रस्तुत गर्ने अवसर पाउने छन् ।

अवार्ड जित्ने यूवा विद्यार्थी उद्यमीले नगद ५० हजारका साथै जर्मनीमा हुन लागेको जीएसइएको विश्व प्रतिस्पर्धामा भाग लिन र नगद ४० हजार अमेरिकी डलर तथा विभिन्न व्यवसायिक सेवाहरु सहित पुरष्कार जित्ने अवसर समेत पाउने छन् ।