काठमडौं  ।  यातायात व्यवसायीहरुले दशैं पर्वका लागि टिकट बुकिङ खुलाएका छन् ।

व्यवसायीहरुले दशैं सुरु हुन एक साता मात्र बाँकि रहँदा शुक्रबार लामो दूरीका गन्तव्यहरुको टिकट बुकिङ खुलाएका हुन् । नेपाल यातायात व्यवसायी राष्ट्रिय महासंघले टिकट बुकिङका लागि बसपार्क, सुन्धारा लगायतका स्थानमा २४ वटा काउण्टरको व्यवस्था गरिएको जानकारी दिएको छ । मध्यम दूरीको टिकट बुकिङ भने असोज १० गते मात्र सुरु गर्ने महासंघका कोषाध्यक्ष सुरेश पौडेलले जानकारी दिए ।

व्यवसायीहरुले ढिला गरी बुकिङ खुलाएका कारण काउण्टरहरुमा यात्रुहरुको ठूलो भीड लागेको छ । टिकट बुकिङ गराउन कतिपय यात्रुहरु विहान चार बजे नै नयाँबसपार्कस्थित काउण्टरमा पुगेका थिए । यात्रुहरुले लामो लाइनका कारण टिकट बुकिङ गराउन चार घण्टासम्म पर्खनुपरेको बताएका छन् । उनीहरुले निर्धारित भाडादरभन्दा बढी मूल्य तिर्नुपरेको पनि बताएका छन् ।

व्यवसायीहरुले बढी भाडा लिनका लागि टिकटमा लामो गन्तव्यको नाम लेखेको यात्रुहरुको भनाइ छ । कैलालीको लम्की जाने टिकटका लागि बसपार्क पुगेका यात्रुले काउण्टरमा खटिएका कर्मचारीले धनगढीसम्मको टिकट भिडाएर १ सय ५० रुपैयाँ बढी लिएको गुनासो गरे ।

प्रहरीले टिकटको मूल्यमा हुने ठगी, फर्जी टिकट लगायतका बारेमा उजुरी गर्न बसपार्क लगायतका विभिन्न १२ स्थानमा नागरिक सहायता कक्षको व्यवस्था गरेको छ । तर यात्रुहरुले कुनै गुनासो नगरेको प्रहरीले बताएको छ । व्यवसायीहरुका अनुसार दशैंका बेला १५ लाखभन्दा बढी यात्रु टिकट बुकिङ गराएर घर जाने गरेका छन् । गत वर्ष भारतले लगाएको नाकाबन्दीका कारण इन्धनको अभावमा सवारीसाधन पातलो संख्यामा चल्दा निकै कमले उपत्यका छाडेकामा यो पटक २० लाख भन्दा बढी टिकट बुकिङ हुने व्यवसायीको अनुमान छ ।

यात्रुको चापलाई ध्यान दिइ कलंकी र कोटेश्वरबाट दैनिक ३ हजार गाडी उपत्यकाबाट वाहिरिने व्यवस्था मिलाइएको नेपाल यातायात व्यवसायी राष्ट्रिय महासंघले जनाएको छ ।