एनआरएन बाल्टिमोरले परराष्ट्रमन्त्री महतलाई अस्थाई सुरक्षा दर्जा नवीकरण सम्बन्धि ज्ञापनपत्र बुझायो

वाशिंगटन डिसी । गैर आवासीय नेपाली संघ बाल्टिमोर शाखाले परराष्ट्रमन्त्री प्रकाश शरण महत (बिद्या वारिधि) लाई अस्थाई सुरक्षा दर्जा (टिपीएस) नवीकरणको लागि अमेरिकन सरकार समक्ष आवश्यक प्रक्रिया अघि बढाई दिन ज्ञापनपत्र बुझाएको छ ।

नेपालको प्रतिनिधित्व गर्दै संयुक्त राष्ट्र संघीय महासभामा सहभागि हुन आएका महतलाई मेरिल्यान्ड शाखाले सेप्टेम्बर २६ तारिख एक अनौपचारिक कार्यक्रममा ज्ञापनपत्र बुझाएको हो ।

उक्त ज्ञापनपत्रमा कुनै कारण विशेषले अस्थाई सुरक्षा दर्जा भर्न नपाएकालाई समेत भर्न पाउने गरि प्रक्रिया अघि बढाईदिन उक्त ज्ञापनपत्रमा माग गरिएको छ । अमेरिकाको मेरिल्याण्ड राज्यको बाल्टिमोरस्थित नेपालीहरुको चर्चित चमेना गृह नेपाल हाउसमा सम्पन्न उक्त कार्यक्रममा परराष्ट्रमन्त्रीलगायत माननिय संसद मोहन बहादुर बस्नेत, परराष्ट्र मन्त्रालयका सचिव शंकर बैरागी, अमेरिकाका लागि नेपलाका राजदुत अर्जुन कुमार कार्की (बिद्या वारिधि), महावाणीज्यदुत प्रेमराजा महतको उपस्थितिमा ज्ञापन पत्र बुझाईएको छ ।

नेपालमा गएको भूकम्पको कारण अमेरिकन सरकारले अमेरिकामा कागजात नभएका नेपाली नागरिकलाई १८ महिनाको लागि अस्थाई सुरक्षा दर्जा उपलब्ध गराएको थियो जसको कारण भूकम्पबाट पिडित आफन्तसँग भेटघाट गर्न समेत सुबिधा अमेरिकन सरकारले दिएको थियो । र, आगामी डिसेम्बर २०१६ मा म्याद गुजार्ने भएकोले यसको लागि परराष्ट्रमन्त्री प्रकाश शरण महतलाई ज्ञापनपत्र बुझाउनु जरुरी भएकोले बुझाईएको मेरिल्याण्ड शाखाका अध्यक्ष जेदु पोख्रेलले बताए ।