सिटी सफारी अब पूर्वमा प्रतिबन्ध

इटहरी    ।   सिटी सफारीलाई राजमार्ग भित्र संञ्चालन गर्न प्रतिबन्ध लगाइएको छ । रुट परमिट अनुसार चल्नु पर्ने सफारी राजमार्ग भित्र जथाभाबी चल्नुको साथै बढी दुर्घटना हुन थालेपछि ट्राफिक प्रहरीले सफारी संञ्चालनमा प्रतिबन्ध लगाएको हो ।

इटहरीबाट सफारीलाई राजमार्गमा चल्न प्रतिबन्ध लगाउने अभियानको शुरुवात गरिएको छ । इटहरी उप–महानगरपालिका क्षेत्र भित्रका राजमार्गमा नियम अनुसार सफारी चल्न पाउदैनन् ।
तर सफारीहरु मनपरी सडक तथा चौकमा संञ्चालन हुन थालेपछि पूर्व क्षेत्रीय ट्राफिक प्रहरी कार्यालय, कोशी अञ्चल यातायत व्यवस्था कार्यालय इटहरी र इटहरी उप–महानगरपालिकाको सयुक्त पहलले सिटी सफारीलाई प्रतिबन्ध लगाइएको हो ।

मुख्यत सफारी चालकहरुको लाईसेन्स समेत नहुँदा दुर्घटना समेत बढेको पाईन्छ ।

राजमार्ग तथा चौकमा मनपरी रुपमा यात्रु बोक्ने गरेको कारण पनि प्रहरीलाई ट्राफिक व्यवस्थापन गर्न निकै समस्या हुने गरेको थियो । यात्रुहरुलाई पनि मनपरी भाडा असुल्ने गरेको कारण पनि पछिल्लो समय सर्वसाधरणले सफारी सजिलो भन्दा पनि घाडो हुन थालेको गुनासो गर्न थालेका छन् ।

पूर्व क्षेत्रीय ट्राफिक प्रहरी कार्यालय इटहरीको तथ्याक अनुसार पनि पूर्वमा सिटी सफारीको कारण दैनिक २५ वटा सम्म दुर्घटना हुने गरेको देखिन्छ ।

एता सिटी सफारी चालकहरुले राजमार्ग तथा चौकमा लगाएको प्रतिबन्धको बिरुद्ध उत्रिएका छन । उनिहरुले आजै पूर्व क्षेत्रीय ट्राफिक प्रहरी कार्यालय इटहरी र इटहरी उप–महानगरपालिका घेराउ गरेका थिए ।

पूर्व क्षेत्रीय ट्राफिक प्रहरी कार्यालय इटहरीका एसपी पवन गिरीले इटहरीबाट शुरु भएको यो अभियान पूर्वका सबै शहरमा लागु हुने जानकारी दिए । रुटमा नचल्नु, दुर्घटना बढाउनु र चालकले लाईसेन्स नबोक्नुले ट्राफिक व्यवस्थापनमा समस्या आउनुको साथै जनगुनासो समेत बढेपछि सफारीलाई राजमार्गमा प्रतिबन्ध लगाइएको गिरीले बताए ।