माछामार्र्न जाँदा सोलुखोलामा एक व्यक्ति बेपत्ता

जेपी थुलुङ, सोलुखुम्बु । माछा मार्ने क्रममा सोलु खोलामा एक जना वेपत्ता भएका छन् । ओखलढुंगा भूसुने स्थाई घर भई हाल दुधकुण्ड नगरपालिका ६ सोलुखुम्बु बस्दै आएका ३० बर्षिया छिरी शेर्पा मंगलबार रातीे २ जना साथी सँगै माछा मार्नका लागि खोलामा गएका बेला वेपत्ता भएका हुन् ।

शेर्पासगैँ गएका ३४ वर्षिया गोपाल श्रेष्ठ र वर्ष ३० का राजेन्द्र श्रेष्ठ भने सकुसलै रहेको जिल्ला प्रहरी कार्यालय सोलुखुम्बुका प्रहरी निरीक्षक पुष्कर बोगटिले जानकारी दिनुभयो ।

उनले बोकेको झोला खोलामा भेटिएपछि उनी खोलाले बगाएर वेपत्ता भएको अनुमान गरिएको छ । शेर्पाको प्रहरी र स्थानीयले खोजी कार्य जारी राखेका छन् । हराइरहेका शेर्पा जिल्ला विकास समिति कार्यालयमा अस्थाई रुपमा कार्यालय सहयोगिको रुपमा काम गर्दै आएका थिए ।