माडिखोलाको पानी सुरुङबाट दाङ ल्याएर बिजुली निकाल्ने सरकारको योजना

दाङ  ।  उर्जा मन्त्री जनार्दन शर्माले माडिखोलाको पानीलाई दाङमा ल्याएर विद्युत निकाल्न र सिचाँई गर्न सकिने गरि प्राबिधिक अध्ययन भएको बताएका छन् ।

नेकपा माओबादी केन्द्र दाङले मंगलबार घोराहीमा आयोजना गरेको दाङ जिल्लाको समग्र विकासका लागि उर्जा, जलश्रोतको सम्भावना र लगानी बिषयक कार्यक्रममा बोल्दै उर्जा मन्त्री शर्माले माडिखोलाको पानीलाई सुरुङ मार्फत दाङमा ल्याउन सकिने बताएका हुन् ।

करिब १७ किलो मिटर सुरुङ खोलेर माडिको पानी घोराहीको सिरानमा ल्याउन सकिने र त्यसबाट ६६ मेगावाट विद्युत निकाल्नुका साथै ७५ हजार हेक्टर जमिन सिँचाई गर्न सकिने योजना बनेको जानकारी दिए ।

उक्त योजनाको सम्भाव्यता अध्ययन समेत भैसकेको र सरकार, समुदाय, निजि क्षेत्रको साझेदारीमा काम गर्ने गरी प्राबिधिक अध्ययन भएको जानकारी दिए । जलस्रोतको सदुपयोग हुन नसकेको भन्दै उनले अब सरकारको नेतृत्व र निजि क्षेत्रको सहकार्यमा घरघरमा विजुली सँगै घरघरको सेयर लगानी गरी दाङको बिकास गर्ने योजना रहेको बताए ।

त्यसैगरी बैकल्पीकरुपमा शारदा नदी र सिउरीको पानीलाई समेत दाङमा ल्याएर देउखुरी सहित घोराही र तुलसीपुर क्षेत्रको भुभागमा सिँचाई गर्न र विद्युत निकाल्न सकिने उनको भनाई छ । कार्यक्रममा उर्जा बिज्ञ कृष्ण शर्माले दाङमा जलस्रोतको माध्यमबाट विद्युत निकाल्न सकिने योजनाका बारेमा अध्ययनको खाकाका बारेमा जानकारी दिएका छन् ।

कार्यक्रममा बिभिन्न गाबिसका नागरिकहरुले विद्युत बिस्तारका लागि उर्जामन्त्री शर्मालाई ज्ञापन पत्र समेत बुझाएका छन् । कार्यक्रममा बोल्ने बक्ताहरुले सरकार दिगो नहुदा कार्य प्रगति पनि स्थायी हुन नसकेको भन्दै दलहरुको आलोचना गरेका छन् ।