दलितका समस्या समाधान गर्न सरकार प्रतिवद्ध : प्रधानमन्त्री

काठमाडौं ।   प्रधानमन्त्री पुष्पकमल दाहाल ‘प्रचण्ड’ले सरकार दलित समुदायका समस्या समाधानप्रति प्रतिवद्ध भएको बताएका छन् ।

मंगलबार बिहान प्रधानमन्त्री निवास बालुवाटारमा राष्ट्रिय दलित मुक्ति मोर्चाका प्रतिनिधिसँगको भेटमा प्रधानमन्त्रीले दलित सिकुदायका समस्या समाधानमा प्रतिबद्ध रहेको बताएका हुन् ।
‘दलित आयोगलाई संबैधानिक मान्यता प्राप्त हुनु ठूलो उपलब्धी हो अव दलितहरुको विकास र सम्वृद्धिका पक्षमा काम गर्दै आएको उपेक्षित, उत्पीडित र दलित वर्ग उत्थान विकास समितिलाई अझ सक्रिय पार्दै अघि बढ्नुपर्छ ।’ प्रधानमन्त्री दाहालको भनाइ थियो ।

भेटका अवसरमा प्रधानमन्त्रीले लक्ष्मी परियार र अजित मिजारको घटनामा संलग्नहरुमाथि कारवाहीका लागि छानविन प्रक्रिया अघि बढेको भन्दै जानकारी दिँदै पीडितका परिवारलाई उचित क्षतिपूर्ति दिइने आश्वसन समेत दिएका थिए ।

तिलक परिवारको नेतृत्वमा बालुवाटार पुगेको प्रतिनिधि मण्डलले लक्ष्मी परियार र अजित मिजारका हत्याराहरुमाथि कारवाही, पीडितलाई क्षतिपूर्ति, दलित विकास समिति खारेज गर्न खोजिएकोमा आपत्ति जनाउँदै प्रधानमन्त्रीलाई ज्ञापनपत्र बुझाएको थियो ।