बालबालिकासम्बन्धी कानुन कार्यान्वयन चुनौतीपूर्ण

बालबालिकाको क्षेत्रमा काम गरिरहेका विभिन्न सरकारी तथा गैरसरकारी संघसंस्थाका सरोकारवालाहरुले बालबालिकासम्बन्धी बनेका कानुनको कार्यान्वयन चुनौतीपूर्ण भएको भन्दै चिन्ता व्यक्त गरेका छन् ।

विगतमा बनेका कानुनहरु बालमैंत्री भए पनि कार्यान्वयन फितलो भएकाले धेरै बालबालिकाहरु अझै असुरक्षित रहेको उनीहरुको बुझाइ छ । बुधबार काठमाडौंमा आयोजिक बालबालिकासम्बन्धी कानुन बारेको अन्तरक्रियामा सहभागीहरुले अब बन्ने ऐन अझ धेरै बालमैत्री हुनुपर्नेमा जोड दिएका छन् । उनीहरुले निर्माणको चरणमा रहेको ऐनमा बालबालिकासम्बन्धी कुनै पनि विषय नछुटाउन माग गरेका छन् । गर्भावस्थादेखिकै विषयलाई समेटेर सशक्त कानुन निर्माण नभए बालजोखिम अझै बढ्ने सहभागीहरुको बुझाइ छ ।

बालबालिकाको सम्बन्ध एउटा मात्रै निकायसँग नहुने भएकाले सबै क्षेत्रले बालबालिकाको पक्षमा नीति बनाएर र कार्यान्वयन गर्नुपर्ने सरोकारवालाहरुको निष्कर्ष छ । अन्तरक्रियामा सहभागी व्यवस्थापिका संसदअन्तर्गतको महिला, बालबालिका, जेष्ठ नागरिक र समाज कल्याण समितिकी सभापति रञ्जु झाले संविधानमा छुटेका कुराहरुलाई पनि समेट्दै बालबालिकासम्बन्धी प्रभावकारी ऐन बनाउनु पर्ने र बनेको ऐनलाई कडाइपूर्वक कार्यान्वयन गर्नुपर्ने बताए ।

कार्यक्रममा प्रस्तावित बालबालिका ऐनका सम्बन्धमा कार्यपत्र प्रस्तुत गर्नुभएको थियो । कार्यपत्रमा प्रस्तावित बालबालिका सम्बन्धी ऐनमा अपाङ्गता भएका, शरणार्थी, गरिब, सीमान्तकृत र अल्पसङ्ख्यक बालबालिकाबारे गरिएको व्यवस्था अपूरो रहेको पनि उल्लेख गरिएको छ ।