ट्रक दुर्घटना, एकको मृत्यु

लुम्बिनी। लुम्बिनी साँस्कृतिक नगरपालिका १ स्थित आईतवार बिहानै पौने तीन बजे फिल्मी शैलीमा भएको ट्रक दुर्घटनामा एक जनाको ज्यान गएको छ ।

ईलाका प्रहरी कार्यालय लुम्बिनीले दिएको जानकारी अनुसार मृत्यु हुनेमा ट्रक कामदार शिवराज नगरपालिका वडा नं. १ बस्ने ५५ बर्षीय मालिकराम थारुको मृत्यु भएको हो ।

-कपिलबस्तुबाट गिट्टी बोकेर भैरहवा जान लागेको लु.१ख.६३७४नं.को अघिल्लो टायर पड्कियो ।
-तौलिहवा भैरहवा सडकखण्ड मोगलहा चौराहाको पूर्ब पट्टि अनियन्त्रित भई सडकको उत्तर दश फीट तल खस्यो ।
-डिजल टंयाकी फुट्यो र आगलागी भयो ।
-आगोमा जलेर गम्भीर घाईते भएका थारुको मेडिकल कालेज भैरहवामा लैजाँदै गर्दा मृत्यु भएको ईप्रका लुम्बिनीका प्रहरी निरीक्षकम पुरुषोत्तम रावत क्षेत्रीले बताए ।
-सोही दुर्घटनामा परि सोही ठाँउ बस्ने ट्रक चालक रोशन चौधरी, सोही ठाँउ बस्ने ५७ बर्षीय लहनु चौधरीको दहिने खुट्टामा चोट लागि मेडिकल कलेज भैरहवामा उपचार भईरहेको छ ।
-ट्रक आगलागी हँुदा स्थानीय तथा सशस्त्र प्रहरी बेस क्याम्पका जवानहरुले आगो नियन्त्रण लिएका थिए ।

दुई घण्टा ढिलो पुगेको लुम्बिनी साँस्कृतिक नगरपालिका र सिद्धार्थ नगरपालिकाको दमकललाई आक्रोशित भीडले ढिलो आएको भन्दै आगो निभाउन नदिई फर्काएको स्थानीय अब्दुल मोकिम मुसलमानले बताए ।

घटना स्थलबाट तीन किलोमिटर दूरीमा रहेको ईप्रका लुम्बिनीको हाता भित्र रहेको दमकल दुई घण्टा ढिलो पुग्नुका कारण बारे ईप्रका लुम्बिनीका प्रनि क्षेत्री सँग जिज्ञासा राख्दा उनले नगरपालिकाको दमकल चालक नहुदा खबर पाउने बित्तिकै प्रहरीकै जिम्मामा दमकल पठाइएको दाबी गरे ।

लुम्बिनी नगरपालिकाको दमकल पानी नभरि खाली राखेको कारण पानी भर्न लागेकोले ढिलो भएको लुम्बिनी साँस्कृतिक नगरपालिका कार्यकारी अधिकृत यमबहादुर कुवरले बताए ।