माओवादीले ध्वस्त बनाएको दरबार अझै पुनर्निर्माण हुन सकेन

अछाम । १६ वर्षअघि तात्कालिन माओवादीले आक्रमण गरी ध्वस्त बनाएको अछाम दरबार पुनर्निर्माण थालिएको ९ वर्ष बितिसक्दा पनि अझै सम्पन्न हुन सकेको छैन । २०५८ साल फागुन ४ गते माओवादीले सदरमुकाम मंगलसेन आक्रमण गर्दा दरबार ध्वस्त भएको थियो ।

२०६५ साल असार २४ गतेबाट सुरु भएको मंगलसेनको टुँडीखेलस्थित अछाम दरबारको पुनर्निर्माणको काम २०६८ सालमा सम्पन्न हुने सम्झौता भए पनि हालसम्म एउटै तल्लाको कामसमेत सकिएको छैन ।

दरबार निर्माणका लागि २ करोड २५ लाख ७३ हजार ६ सय ४५ रुपैयाँमा साउद कन्ट्रक्सनले जिम्मा लिएको शहरी विकास डिभिजन कार्यालयका झपट विकले जानकारी दिए । काठको अभावका कारण समयमै निर्माण कार्य सम्पन्न गर्न नसकिएको ठेकेदार कम्पनीले जनाएको छ । सरकारले एक जिल्लाबाट अर्को जिल्लामा काठ ओसारपसारमा लगाएको प्रतिबन्धका कारण आवश्यक काठ उपलब्ध नहुँदा काममा ढिलाई भएको ठेकेदार जयबहादुर साउदले बताए ।

सम्बन्धित निकायको बेवास्ता र ठेकेदार कम्पनीको लापरवाहीका कारण जिल्लाकै नमुनाको रुपमा रहेको दरबार निर्माण हुन नसकेको स्थानीयले आरोप लगाएका छन् ।