व्यवस्थापिका संसद् विकास समितिले काठमाडौं उपत्यका भित्रको सडक संरचनालाई व्यवस्थित बनाउन तत्काल स्पष्ट खाका तयार पार्न सरकारलाई निर्देशन दिएको छ ।
समितिको सोमबार बसेको बैठकले काठमाडौं उपत्यकाभित्रको सडक संरचनालाई व्यवस्थित बनाउन तत्काल स्पष्ट खाका तयार पार्न भौतिक पूर्वाधार तथा यातायात मन्त्रालय, गृह मन्त्रालय र काठमाडौं महानगरपालिकालाई पुनः निर्देशन दिएको हो । उपत्यकाको सडक संरचनालाई व्यवस्थित बनाउन पटक–पटक दिइएको निर्देशन कार्यान्वयनमा नआएपछि त्यसको कारण समेत खुल्ने गरी स्पष्ट खाका तयार पार्न सरकारलाई पुनः निर्देशन दिनु परेको समितिका सभापति रविन्द्र अधिकारीले जानकारी दिए ।
समितिले गृह मन्त्रालय, काठमाडौं महानगरपालिकाका प्रतिनिधि समेत रहने गरी खाका तयार पार्ने कामको संयोजन गर्ने जिम्मेवारी भने भौतिक पूर्वाधार तथा यातायात मन्त्रालयका सचिव देवेन्द्र कार्कीलाई दिएको छ ।
विकास समितिले सार्वजनिक यातायातलाई सहज, सुलभ र भरपर्दो बनाउने गरी अल्पकालीन र दीर्घकालीन योजना बनाउन विगतमा दिइएको निर्देशन पालना गर्न पनि सरकारलाई सचेत गराएको छ । बैठकमा बोल्दै भौतिक पूर्वाधार तथा यातायात मन्त्रालयका सचिव देवेन्द्र कार्कीले यातायात व्यवस्था विभागमा हुने सरुवा र बढुवाका कारण यातायात क्षेत्रको व्यवस्थापनमा कठिनाई हुने गरेको प्रष्टिकरण दिए । उनले सामान्य प्रशासन मन्त्रालयले आफ्नो मन्त्रालयलाई जानकारी समेत नदिई कर्मचारी सरुवाको काम गर्दा यातायात क्षेत्रको व्यवस्थापनको काम अलपत्र पर्ने गरेको पनि गुनासो गरे ।
समितिले काठमाडौं उपत्यकाको सडक संरचनालाई व्यवस्थित बनाउन सरकारलाई पटक पटक सचेत गराउँदै आएको छ ।
