नदीमा पानीको सतह बढेपछि सुरक्षा निकायलाई उच्च सतर्कतामा रहन निर्देशन

कैलाली । लगातारको बर्षाका कारण कैलाली र कञ्चनपुरका नदीमा पानीको सतह बढेपछि स्थानीय प्रशासनले सुरक्षा निकायलाई उच्च सतर्कतामा रहन निर्देशन दिएको छ ।

बाढी, पहिरोबाट हुनसक्ने सम्भावित जोखिम न्यूनीकरण गर्न कैलालीमा तीनवटै सुरक्षा निकायलाई सतर्क अवस्थामा राखिएको छ । जिल्लामा केही दिन यता लगातार वर्षा भइरहेको भन्दै जिल्ला दैवी प्रकोप उद्धार समितिले नेपाल प्रहरी, सशस्त्र प्रहरी र नेपाली सेनालाई तयारी अवस्थामा राखेको जनाएको हो ।

यसका साथै स्थानीय स्तरमा विपद् व्यवस्थापनको क्षेत्रमा काम गर्दै आएका समूहलाई पनि सतर्क रहन आग्रह गरिएको जिल्ला दैवी प्रकोप उद्धार समितिका संयोजक तथा प्रमुख जिल्ला अधिकारी गोविन्दप्रसाद रिजालले जानकारी दिए ।

बाढी र डुबानको उच्च जोखिममा रहेका क्षेत्रका बस्तीका बासिन्दालाई समेत सतर्क अवस्थामा रहन आग्रह गरिएको छ । प्रमुख जिल्ला अधिकारी रिजालले कैलालीका कर्णाली, मोहना, कान्द्रा, कटेनी, घुराह, खुटिया, पथरी, शिवगंगा, गोदावरी र मनहरा नदीमा पानीको सतह खतरा नजिक पुगेको जानकारी दिए ।