भारत र चीनका सेनाबीच झडप हुँदा दुवै देशका सेना घाइते

भारत र चीनको सीमामा दुई देशका सेनाबीच झडप भएको छ । पश्चिम हिमालय क्षेत्रको लद्दाखस्थित लाइन अफ एक्चुअल कन्ट्रोल (एलओसी) मा दुई देशका सेनाबीच मंगलबार ढुंगा हानाहान भएको भारतीय अधिकारीहरूले जानकारी दिएका छन् । प्याङगोङ तालनजिकैको भारतीय भूमिमा चिनियाँ सेना प्रवेश गरेपछि दुवै देशका सेनाले एक–अर्कालाई हतियार ताक्ने प्रयास गरेका थिए । यो खबर एजेन्सीलाई उद्धृत गर्दै आजको नयाँ पत्रिकामा छापिएको छ।

दुवै देशका सेना सामान्य घाइते

सिक्किम, भुटान र तिब्बतको दोकलाममा विवाद बढिरहेकै वेला जनमुक्ति सेनाले भारतीय सेनालाई थप चुनौती दिएको छ । तिब्बतबाट भारततर्फ बढिरहेको चिनियाँ सेना सीमामा रहेको ताल कटेर आउने क्रममा झडप भएको हो । तालको दुईतिहाइ भाग चीनले ओगटेको भारतले दाबी गरेको छ । ‘चीनका जनसेना भारत अधीनस्थ फिंगर ४ र फिंगर ५ तर्फ बढेपछि दुई देशका सेनाबीच झडप भएको छ । दुवै देशका सेनाबीच ढुंगा हानाहान भएको छ,’ भारतीय अधिकारीको भनाइ उद्धृत गर्दै दी टाइम्स अफ इन्डियाले जनाएको छ । ढुंगा लागेर दुवै देशका सेना सामान्य घाइते भएका छन् । चीनको अतिक्रमणबाट जोगाउन मानव सिक्री बनाउनुपरेको भारतीय सेनाका अधिकारीहरूले बताएका छन् ।

चीनले दखल दियो : भारत

चार हजार ५७ किलोमिटर लामो एलओसीको सबै तीनवटा क्षेत्रहरू पश्चिम (लद्दाख), मध्यभाग (उत्तराखण्ड र हिमाञ्चाल) र पूर्वी खण्ड (सिक्किम र अरुणान्चल प्रदेश)मा चिनियाँ सेनाले निरन्तर दखल दिएको भारतीय सेनाको आरोप छ ।

गत महिना मात्र उत्तराखण्डको चामोली जिल्लाको गैरसैनिक क्षेत्रमा १५ चिनियाँ सेनाले अतिक्रमण गरेको भारतीय पक्षको दाबी छ । पूर्वी लद्दाखको चुमार, दिपसाङ, पाङगोङलगायतका क्षेत्र विगत केही वर्षदेखि दुई देशका सेनाबीच तनावको केन्द्रबिन्दु बनेको छ ।

लद्दाखमा यसअघि पनि छिटफुट रूपमा दुई देशका सेनाबीच झडप हुने गरेको भारतीय सेनाले जनाएको छ । १३ हजार नौ सय फिटको उचाइमा चाङला पासमा रहेको पाङगोङ तालमा दुवै देशका सेनाले एक–अर्काविरुद्ध सशस्त्र डुंगा परिचालन गरेका छन् । सो क्षेत्रमा दुवै देशका सेनाले दिनहुँजसो डुंगा, मोर्टार र पैदल गस्ती गर्छन् । तालको दक्षिणी किनारको माथिल्लो भागमा चीनले सानो मार्ग बनाएको भारतको दाबी छ । सन् १९९९ मा पाकिस्तानसँगको कार्गिल युद्धमा सो क्षेत्र द्वन्द्वको मुख्य केन्द्रबिन्दु थियो ।

सीमा विवादलाई लिएर दुई देशबीच सन् १९६२ मा युद्ध भएको थियो । अधिकांश क्षेत्रमा विवाद समाधान नहुँदा दुई देशबीच बारम्बार तनाव हुने गरेको छ ।

चिनियाँ भूमि छोड्नुपर्छ

चिनियाँ जनसेना सीमा पार गरेर भारत नपुगेको बेइजिङले बताएको छ । जनसेनाले आफ्नो भूभागको रक्षाका लागि सदैव गस्ती गरेको तर अतिक्रमण गरेर भारतीय भूमिमा नपुगेको चीनको विदेश मन्त्रालयका प्रवक्ता हु चुनिङले बताइन् । ‘चीन–भारत सीमामा शान्ति र स्थिरता कायम गर्न चिनियाँ पक्ष सदैव प्रतिबद्ध छ,’ उनले भनिन् । दुई देशबीच भएका सम्झौताको पालना गर्न उनले भारतलाई आग्रह गरिन् । भारतले तत्कालै र विनासर्त सम्पूर्ण जवान र हतियार चिनियाँ भूमिबाट हटाउनुपर्ने विदेश मन्त्रालयले जनाएको छ । झडप हुँदा जनमुक्ति सेना चिनियाँ भूमिमा नै रहेको बेइजिङले दाबी गरेको छ ।