दशैं आउनै लाग्दा पनि सुकेटार विमानस्थल सञ्चालनमा आएन

ताप्लेजुङ । नेपालीहरुको महान चाड बडादशैं नजिकिँदै गर्दासमेत ताप्लेजुङको सुकेटार विमानस्थल सञ्चालन नहुँदा यात्रु अन्योलमा परेका छन् ।

गत जेठ अन्तिमदेखि रोकिएको सेवा हालसम्म पनि सञ्चालन नहुँदा यात्रु मर्कामा परेका हुन् ।

दशैंको लागि टिकट खुल्ने समय भए पनि हालसम्म मौसमको कारण कारण देखाउँदै जहाज उडाउने या नउडाउने भन्ने मै अन्याल रहेकाले टिकट बुकिङ नखुलाइएको नेपाल वायु सेवा निगम ताप्लेजुङका प्रमुख विकास राईले बताए ।

दोहोरो धावन मार्ग बनाई कालोपत्रे गरेर तयार पारिएको विमानस्थल अझै सञ्चालनमा आउन नसक्दा आफूहरु अन्यायमा परेको गुनासो स्थानीयको छ ।

२०२८ सालमा निर्माण भएको सुकेटार विमानस्थललाई निर्माण भएको चार दशकपछि झन्डै नौ करोडको लागतमा कालोपत्रे गरिएको हो ।

नागरिक उड्ययन प्राधिकरणबाट स्तरोन्नतिको काम भएको सुकेटार विमानस्थललाई तीन वर्षअघि ६ सय मिटरबाट बढाएर नौ सय ३० मिटर बनाइएको थियो ।