चार किलो अफिमसहित तीनजना समातिए

काठमाडौं, चैत ६ । नेपाल प्रहरीको लागुऔषध नियन्त्रण ब्यूरोले चार किलो लागुऔषध अफिमसहित तीनजनालाई पक्राउ गरेको छ ।

मंगलबार काठमाडौंको दक्षिणकालीबाट पक्राउ परेकाहरुमा मकवानपुर, बकैया–६ का सोमबहादुर तितुङ, मकवानपुर, रानीसेराका बज्रबहादुर भोम्जन र मकवानपुर, गढी–शिखरकोटका प्रेमबहादुर थिङ रहेका छन् ।

उनीहरुको साथबाट केही नगद र मोबाइलहरु पनि बरामद गरिएको प्रहरीले जनाएको छ ।

लागुऔषध अफिमको खेती नेपालमा हुने गरेपनि प्रशोधन भने विदेशमै हुने गरेको ब्यूरोका प्रमुख प्रहरी नायब महानिरीक्षक ठूले राईले बताए ।

पक्राउ परेका तीनैजनालाई जिल्ला अदालतबाट म्याद लिइ आवश्यक अनुसन्धान भइरहेको पनि प्रहरीले जनाएको छ ।