प्रहरीको घेरा तोडेर तालाबन्दी

इलाम, वैशाख २० । विभिन्न मागसहित आन्दोलनमा उत्रिएको संयुक्त विद्यार्थी संगठनले शिक्षा विकास तथा समन्वय इकाइ इलामको कार्यालयमा तालाबन्दी गरेको छ ।

अनेरास्ववियु, नेविसंघ, अखिल क्रान्तिकारी, समाजवादी विद्यार्थी फोरम र नयाँ शक्ति विद्यार्थी युनियन सम्मिलित संयुक्त विद्यार्थी संगठनले बिहीबार प्रहरीको घेरा तोडेर तालाबन्दी गरेको हो ।

विभिन्न ११ बुँदे शैक्षिक मागसहितको ज्ञापनपत्र पेस गर्दै ती विद्यार्थी संगठनसम्बद्धहरुले जिल्ला शिक्षा अधिकारीको कार्यकक्षमा तालाबन्दी गरेका हुन् ।

शैक्षिक क्षेत्रमा मौलाएको शुल्कवृद्धि, कालोबजारी, अनियमितता अन्त्यको माग गर्दै अनिश्चितकालका लागि तालाबन्दी गरिएको जनाइएको छ ।

तालाबन्दीकाक्रममा प्रहरी र विद्यार्थीहरुबीच सामान्य ठेलाठेलसमेत भएको थियो ।

प्रहरीले संयुक्त विद्यार्थी संगठनलाई शिक्षा कार्यालय प्रवेशमा रोक लगाएपछि ठेलाठेल भएको हो ।

प्रहरीले विद्यार्थीलाई कार्यालय परिसरमै रोकेपछि विद्यार्थीले शिक्षा विकास इकाइ र प्रहरीविरुद्ध चर्को नाराबाजी गरेका थिए ।

प्रहरी दमन भएको भन्दै चर्को नाराबाजी गर्दै विद्यार्थी प्रहरीको घेराबन्दी तोडेर शिक्षा विकास तथा समन्वय इकाइको कार्यालयमा प्रवेश गरेका थिए । प्रहरीले भने संयमता अपनाएको देखिन्थ्यो ।

केन्द्रीय कार्यक्रमअनुसार तालाबन्दी गरिएको भन्दै संयुक्त विद्यार्थी संगठनले शुक्रबार इलाम नगरपालिका र सूर्योदय नगरपालिकामा सिटी जुलस गर्ने कार्यक्रम रहेको जनाएको छ ।

यसअघि, संयुक्त विद्यार्थी संगठनले निजी तथा आवसीय विद्यालय अर्गनाइजेसन (प्याब्सन)को कार्यालयमा तालाबन्दी गरेको थियो ।