यातायात व्यवसायी राष्ट्रिय महासंघका ६ जना पदाधिकारी रिहा

काठमाडौं, वैशाख २३ । सार्वजनिक यातायात क्षेत्रमा हडताल आह्वान गरेपछि पक्राउ परेका नेपाल यातायात व्यवसायी राष्ट्रिय महासंघका ६ जना पदाधिकारी आगामी दिनमा हडताल नगर्ने सर्तमा रिहा भएका छन् ।

महानगरीय प्रहरी परिसर काठमाडौंमा आइतबार दिउँसो यातायातमा ‘सिन्डिकेट’ नगर्ने, निर्वाध यातायात सन्चालन गर्ने र आगामी दिनमा बन्द, हडतालसमेत नगर्ने सर्तमा लिखित सम्झौता गरेपछि उनीहरु रिहा भएका हुन् ।

रिहा हुनेहरुमा महासंघका अध्यक्ष योगेन्द्र कर्माचार्य, महासचिव सरोज सिटौला, उपाध्यक्ष विजय स्वाँर, वसन्त भण्डारी, धर्म धिमाल र किरण खड्का रहेका छन् ।

शुक्रबार देशभर सार्वजनिक गाडी नचलाएर आन्दोलनमा उत्रेका १०० भन्दा धेरै व्यवसायी पक्राउ परेका थिए । तीमध्ये ‘कानुनबमोजिम चल्छु र आइन्दा हडताल गर्दिनँ’ भन्नेलाई कागज गराएर रिहा गरिएको हो ।

कागज गर्न नमान्ने व्यवसायीकाबारेमा भने अनुसन्धान गर्ने र कानुनअनुसार कारबाही गर्ने प्रहरीले जनाएको छ ।