मोदी आउँदा जनकपुरमा माक्स लगाएर र सामान बोकेर हिँड्न निषेध

जनकपुर, वैशाख २७ । भारतीय प्रधानमन्त्री नरेन्द्र मोदी जनकपुरमा आउन केही घन्टामात्र बाँकी रहँदा तयारी करिब सकिएको छ ।

जिल्ला प्रशासन कार्यालय धनुषाकाअनुसार अहिले धनुषामा ९ हजार सुरक्षाकर्मी परिचालन गरिएको छ ।

मोदीको स्वागत र नागरिक अभिनन्दनका लागि सम्पूर्ण तयारी लगभग पूरा भइसकेको छ । यद्यपि, बाँकी तयारी अझै चलिरहेकै छ ।

बिहीबार (आज) मध्याह्न १२ बजेदेखि शुक्रबारसम्म जानकी मन्दिरमा सर्वसाधारणलाई प्रवेशमा रोक लगाइएको छ । मोदीको अभिनन्दन गरिने बाह्रबिघासमेत सुरक्षाकर्मीले घेरेका छन् ।

धार्मिक र ऐतिहासिक नगर जनकपुर सिंगारेर चिरिच्याँट्ट पारिएको छ । विमानस्थलबाट जानकी मन्दिर र नागरिक अभिनन्दनस्थलसम्म पर्खालको रङरोगन त्यसमाथि मिथिला संस्कृति झल्कने विभिन्न चित्रकलासमेत बनाइएका छन् ।

२९ घन्टा नेपालमा रहँदा मोदीले जनकपुरधाममा करिब दुई घन्टा बिताउने कार्यतालिका छ ।

बिहीबार बिहान सवा १० बजे जनकपुरमा आइपुग्ने उनी जानकी मन्दिरमा पूजापाठ सकाएर रंगभूमि मैदानमा अभिनन्दन कार्यक्रममा सरिक हुनेछन् ।

मोदीको स्वागत र अभिनन्दनका लागि लाखौं नागरिकलाई सहभागी हुनसमेत प्रदेश सरकारले आग्रह गरेको छ ।

त्यस्तै, भारतीय प्रधानमन्त्री मोदी आएको बेला जनकपुर क्षेत्रमा माक्स लगाएर र सामान बोकेर हिँड्नसमेत निषेध गरिएको छ ।

मोदीको भ्रमणलाई लक्षित गरी प्रदेश नम्बर–२ मा शुक्रबार सार्वजनिक बिदासमेत दिइएको छ ।