काम पूरा नगर्ने र बिचैमा छाडेर भाग्ने ठेकेदारलाई कारवाही हुन्छः गृहमन्त्री

ताप्लेजुङ, जेठ १९ । गृहमन्त्री रामबहादुर थापाले मुलुकको समृद्धिका लागि सवै पक्षलाई गम्भीर भएर लाग्न आह्वान गरेका छन् ।

जिल्ला प्रशासन कार्यालय ताप्लेजुङको नवनिर्वाचित भवनको उद्घाटन गर्न आज ताप्लेजुङमा पुगेका गृहमन्त्री थापाले संचारकर्मीहरुसँग कुरा गर्दै भौतिक पूर्वाधारको विकास नै समृद्धिको आधार भएकाले यसमा हेलचेक्र्याइँ गर्न नहुने बताए ।

उनले सरकारले आर्थिक विकास समृद्धिलाई प्राथमिकतामा राखेको भन्दै यसमा सहयोग गर्न आग्रह गरे । कुनै पनि भौतिक पूर्वाधार निर्माणमा संलग्न भएकाहरुले अब काम पूरा गर्र्नैपर्ने उनको भनाइ थियो ।

काम पूरा नगर्ने र बिचैमा छाडेर भाग्ने ठेकेदारलाई सम्बन्धित मन्त्रालयले छानबिन गरेपछि कारबाही गर्न सहयोग गर्ने उनले प्रतिबद्धता व्यक्त गरे ।

गृहमन्त्री थापाले पाथीभरा जाने सडक निर्माणमा भएको ढिलासुस्तिका विषयमा समेत चासो राखेका थिए ।

२०७२ साल असारमा (कन्काई) कम्पनीले दुई वर्षभित्रै ग्राभेल गर्ने, नाली काट्ने काम सक्ने गरि सम्झौता गरे पनि हालसम्म काम पुरा नभएकोमा सञ्चारकर्मीलगायतले स्थानीयबासिन्दाले मन्त्री थापाको ध्यानाकर्षण गराएका थिए ।