एसियाडमा अधिकारीले राष्ट्रिय झन्डा बोक्ने

काठमाडौं, भदौ १ । एसियाली खेलकुद (एसियाड) प्रतियोगिताको १८औं संस्करणको उद्घाटन समारोहको मार्चपासमा भारोत्तोलनका कमलबहादुर अधिकारीले नेपालको राष्ट्रिय झन्डा बोक्ने भएका छन् ।

प्रतियोगिताको इन्डोनसियाको राजधानी जाकार्तास्थित गेलोरा बुङ कार्नो रंगशालामा शनिबार भव्य उद्घाटन हुँदैछ ।

त्रिभुवन आर्मी क्लबसँग आबद्ध अधिकारी एसियाडमा भाग लिएका नेपाली खेलाडीमध्ये सिनियर हुन् । उनले जाकार्ता एसियाडमा ७७ केजी तौल समूहमा प्रतिस्पर्धा गर्दैछन् ।

अधिकारीले सन् २००६ मा श्रीलंकामा आयोजना भएको दशौं दक्षिण एसियाली खेलकुद (साग) मा स्वर्णपदक हासिल गरेका थिए ।

त्यसयता उनले ओलम्पिकमा पनि भाग लिँदै आएका छन् । एसियाडमा अधिकारीको यो लगातार चौथोपटक प्रतिस्पर्धा हो ।

गत वर्ष दक्षिण कोरियाको इन्चोनमा एसियन सिनियर कप र एसियन इन्टर क्लब भोरोत्तोलन च्याम्पियनसिपमा ६ ओटा कास्यपदक जितेका थिए ।

‘नेपालको झन्डा बोकेर ४५ देशका खेलाडी तथा अफिसियलसमक्ष प्रस्तुत् हुन पाउनु खुसीको कुरा हो’–अधिकारीको भनाइ उद्धृत गर्दै राष्ट्रिय खेलकुद परिषद्का प्रशासकीय अधिकृत लोकेन्द्र बस्नेतले जानकारी दिए ।

एसियाडमा एसियाका नेपालसहित ४५ देशले विभिन्न ४२ खेलमा प्रतिस्पर्धा गर्दैछन् ।

नेपालले प्रतियोगिताको २९ खेलमा भाग लिएको छ । जसमा १८५ खेलाडी (पुरुष १२९ र महिला ५६) ले प्रतिस्पर्धा गर्दैछन् । रासस