प्रकाशित मिति : शुक्रबार, अशोज १२, २०७५
सुरेन्द्रबहादुर नेपाली (रासस)
न्यूयोर्क, असोज १२ । प्रधानमन्त्री केपी शर्मा ओलीले शुक्रबार संयुक्त राष्ट्रसंघका महासचिव एन्टोनियो गुटेरेससँग द्विपक्षीय भेटवार्ता गरेका छन् ।
उक्त अवसरमा नेपाल तथा राष्ट्रसंघबीच सहयोगका विभिन्न पक्षका विषयमा छलफल भएको राष्ट्रसंघका लागि नेपाली स्थायी नियोगले शुक्रबार विज्ञप्ति प्रकाशन गरी जनाएको छ ।
उनीहरुबीच शान्ति स्थापना गर्ने अभियान र त्यसमा नेपालको भूमिका विस्तार गर्ने विषयमा पनि छलफल भएको विज्ञप्तिमा उल्लेख गरिएको छ ।
महासचिव गुटेरेसले शान्तिपूर्ण संक्रमणमा नेपालमा सशक्त प्रजातन्त्र स्थापना हुनु उदाहरणीय भएको बताउँदै नेपालको पुनःसंरचना तथा दिगो विकासका लक्ष्य प्राप्त गर्न राष्ट्रसंघीय सहयोगको वचनबद्धता दोहोर्याए ।
प्रधानमन्त्री ओलीले नेपालको विकासमा राष्ट्रसंघको सहयोगप्रति कृतज्ञता प्रकट गरे ।
© copyright 2016-2019 and all right reserved to jaljalakhabar | Site By : sobij
