साहित्यकार शिव रेग्मीको निधन

काठमाडौँ । वरिष्ठ साहित्यकार एवं अन्वेषक शिव रेग्मीको ७८ वर्षको निधन भएको छ।

विक्रम संवत् १९९८ असोज १ मा काठमाडौँमा जन्मिएका रेग्मीलाई बुधबार सुतेको केही बेरमा श्वास फेर्न असजिलो भएपछि उपचारार्थ काठमाडौँ मेडिकल कलेजमा भर्ना गरिएकामा अचानक उनको निधन भएको नेपाल साहित्यिक पत्रकार सङ्घका निवर्तमान अध्यक्ष रोचक घिमिरेले जानकारी दिएको छ।

चिनी र उच्च रक्तचापबाट पीडित भए पनि उनमा खासै कुनै समस्या नभएको र ब्रेनहेमरेजका कारण उनको निधन भएको जानकारी अस्पतालले दिएको उनले बताए। स्वर्गीय रेग्मीको बुधबार पशुपति आर्यघाटमा अन्त्येष्टि गरिएको छ।

‘भूपि शेरचनका कविता’, ‘गोरखापत्र सय वर्षका १०१ कथा’, ‘शारदाका सम्पादकीय विचारहरु’, ‘नेपाली क्रान्तिकको भूमिकै भूमिका’, ‘शङ्कर लामिछानेका निबन्ध’, ‘गोरखापत्रका १०१ निबन्ध’, ‘कमल दीक्षितको दुष्टि स् दृष्टिकोण’ आदि उहाँद्वारा सम्पादित कृति प्रकाशित छन्।

उनी गोरखादक्षिण बाहु र त्रिशक्ति पटबाट विभूषित थिए। त्यस्तै २०७० सालमा उनलाई मदन पुरस्कार गठनले जगदम्बाश्री पुरस्कार प्रदान गरेको थियो।