अदालतको फैसला – ‘वीर्यदाता नै कानुनी पिता, उसैलाई बच्चाको भविष्य तय गर्ने अधिकार’

सिड्नी। अस्ट्रेलियाको हाइकोर्टले वीर्य दान गर्ने व्यक्तिलाई नै बच्चाको कानुनी पिता भएको ठहर गरेको छ । फैसलाअनुसार वीर्यदान गर्ने ती व्यक्तिलाई बच्चाको पिताको हैसियतमा सबै फैसला गर्ने अधिकार हुनेछ । वीर्य दाता रोबर्ट (नाम परिवर्तन)ले २००६ मा आफ्ना समलिंगी साथीलाई वीर्य दान गरेका थिए । यसअघि तल्लो अदालतले यस विषयमा रोबर्टविरुद्ध फैसला गरेको थियो ।

यो विषयमा विवाद तब सुरु भएको थियो जब यी बालिकाकी आमाले आफ्ना समलिंगी पार्टनरसँग न्यूजिल्याण्ड जाने निर्णय गरिन् । रोबर्टले आमाको यो फसलाविरुद्ध अदालतमा निवेदन दिए । तल्लो अदालतमा लामो सुनुवाइ चल्यो । त्यसपछि अदालतले बालिकामाथि अधिकार केवल उनकी आमाको हुने फैसला गर्यो । त्यसपछि रोबर्टले यो फैसलाविरुद्ध हाइकोर्टमा अपिल गरे ।

बुधबार हाइकोर्टले तल्लो अदालतको फैसला उल्ट्याइदियो । न्यायाधीश मारग्रेट क्लेरीले तल्लो अदालतको फैसला सरासर गलत भएको ठहर गरिन् । न्यायाधीशका अनुसार बालिकाको जन्म प्रमाणपत्रमा रोबर्टको नाम छ र यी दुई बाबुछोरीको सम्बन्ध निकै आत्मीय छ । रोबर्ट बालिकासँग बस्दैनन् तर उनको सबै खर्च उठाइरहेका छन् । त्यसैले उनलाई नै वास्तविक पिता मानिनेछ ।

अदालतले यो पनि भनेको छ कि रोबर्टसँग बालिकाको भविष्य तय गर्ने अधिकार हुनेछ । रोबर्टलाई बालिकासँग भेट्न समस्या नहोस् भन्नका लागि आमा बालिकासँग अस्ट्रेलियामै बस्नु पर्नेछ । यद्यपि यो फैसलालाई भविष्यको लागि नजीर मानिनेछ वा छैन भन्ने स्पष्ट हुन सकेको छैन ।