कश्मीरको तस्वीरलाई शालिकराम पुडासैनीको भन्दै कसले बनायो भाइरल ? के हो यथार्थ ?

यतिबेला सामाजिक सञ्जालमा नुवाकोटका पत्रकार शालिकराम पुडासैनीलाई यातना दिएको भन्दै ढाडमा लाठीको डाम सहितको तस्वीर भाइरल भइरहेको छ । रवि लामिछाने समर्थन भन्ने नाउँमा खोलिएका विभिन्न फेसबुक पेज तथा ग्रुपमा तस्वीर भाइरल बनाउँदै शालिकरामलाई यातना दिएर मारिएको दावी गरिएको छ । नुवाकोटका पत्रकार शालिकराम पुडासैनीको आत्महत्या प्रकरण सम्बन्धी अधिकांश समाचारको कमेन्टमा पनि उक्त तस्वीर राखेर पोष्ट गरिएको छ ।

उस्तै तस्वीर एक भारतीय नागरिकले ट्विटरमा कश्मीरको घटना अपडेट भन्दै पोष्ट गरेका छन । उनले उक्त तस्वीरसँगै अन्य घाईते भएकाको समेत तस्वीर पोष्ट गरेका छन । सामाजिक सञ्जालमा शालिकरामलाई यातना दिएको भन्दै राखिएको उक्त तस्वीरबारे प्रहरीले सार्वजनिक रुपमा केही प्रतिकृया दिएको छैन । नुवाकोटका पत्रकार शालिकराम पुडासैनीको मृत्यु प्रकरणमा अनुसन्धान गर्न टेलिभिजन कार्यक्रम प्रस्तोता रवि लामिछाने समातिएका छन ।

माउन्टेन टेलिभिजनका पत्रकार पुडासैनी यही साउन २० गते चितवनको नारायणगढस्थित होटल कङ्गारुको कोठाभित्र झुण्डिएको अवस्थामा मृत भेटिएका थिए । घटना हुनुअघि उनले न्यूज २४ टेलिभिजनको ‘सिधा कुरा जनतासँग’ कार्यक्रमका सञ्चालक रवि लामिछाने, सोही कार्यक्रममा कार्यरत युवराज कँडेल र ओखल्ढुङ्गाकी रुकु भन्ने अस्मिता कार्कीको नाम लिएर आफूलाई यो अवस्थामा पु¥याउन बाध्य बनाएको भन्दै रेकर्ड गरिएको भिडियो सार्वजनिक भएको थियो ।

उक्त भिडियोका आधारमा प्रहरीले अनुसन्धानका लागि उनीहरूलाई साउन ३० गते बिहीबार काठमाडौँबाट पक्राउ गरी चितवन लगेको थियो । उनीहरुलाई प्रहरीले साउन ३१ गते शुक्रबार चितवन जिल्ला अदालतमा पेश गरेकामा अदालतले अनुसन्धानका लागि पाँच दिनको म्याद दिएको थियो ।