२२ जना ‘फ्री तिब्बत’ समर्थक पक्राउ, गुम्बाको वरिपरी प्रहरी तैनाथ

काठमाडौं–महानगरीय प्रहरी परिसर काठमाडौंले फ्री तिब्बत समर्थकको आशंकामा २२ जनालाई पक्राउ गरेको छ । उनीहरुलाई काठमाडौंको विभिन्न स्थानबाट पक्राउ गरिएको हो ।

महानगरीय प्रहरी परिसर काठमाडौंका प्रवक्ता होविन्द्र बोगटीका अनुसार काठमाडौंको वौद्ध, स्वयम्भु र फर्पिङबाट २२ जनालाई पक्राउ गरिएको छ । प्रदर्शनको तयारी गरिरहेको आशंकामा उनीहरुलाई पक्राउ गरिएको प्रहरीले जनाएको छ ।

उनीहरुको साथबाट फ्री तिब्बत लेखिएको टिसर्ट, झोला लगायतको सामग्रीसमेत बरामद भएको छ । उनीहरुको साथबाट टिबेटिएन झण्डा समेत भेटिएको छ भने फ्री तिब्बतको नारा लेखिएको ट्रयाकसुट लगाएको व्यक्ति पनि पक्राउ गरिएको प्रहरीले जनाएको छ ।

पक्राउ पर्नेमा अधिकांश तिब्बती नागरिक छन् भने केही नेपाली नागरिकलाई पनि पक्राउ गरिएको छ । यद्यपि पक्राउ परेकाहरुले प्रदर्शनको तयारीबारे भने केही बताएका छैनन् ।

गुम्बा वरिपरि निगरानी बढ्यो
यसैबीच चिनियाँ राष्ट्रपति सी जिनपिङको नेपाल भ्रमणको क्रममा प्रदर्शन हुन सक्ने आशंकामा उपत्यकाका तीनै जिल्लाका सबैजसो गुम्बाहरुमा प्रहरी तैनाथी बढेको छ । फ्रि तिब्बतको प्रदर्शन हुन सक्ने भन्दै ती गुम्बाहरुमा सुरक्षा सतर्कता बढाइएको प्रहरीले जनाएको छ । प्रहरीले वौद्धक्षेत्रमा सबैभन्दा बढी सुरक्षा सतर्कता अपनाएको छ । तिब्बती शरणार्थीको क्याम्पसमेत भएकाले वौद्धक्षेत्रमा प्रदर्शन हुनसक्नेतर्फ सचेत हुँदै सुरक्षा व्यवस्था अत्यन्तै कडा पारिएको प्रहरीले जनाएको छ । त्यसैगरी वौद्धक्षेत्रको सुरक्षा व्यवस्था पनि कडा पारिएको छ भने अपरान्ह ती क्षेत्रहरुमा हिँडडुल गर्नसमेत नदिने गरी प्रहरीले सुरक्षाको प्रबन्ध मिलाएको छ ।