न्यायाधीश कुमार रेग्मी र विष्णु पौडेलका छोरा नवीन अब सरकारी साक्षी !

ललिता निवास जग्गा प्रकरणमा १ सय ७५ जना व्यक्तिमाथि बुधबार अख्तियार दुरुपयोग अनुसन्धान आयोगले भ्रष्टाचार तथा जग्गा फिर्ता लिने प्रयोजनका लागि प्रतिवादी बनाएर विशेष अदालतमा मुद्दा दायर गर्‍यो ।

अख्तियारले भ्रष्टाचारको मुद्दा दायर गर्दै गर्दा धेरैको नजर नेकपाका महासचिव विष्णु पौडेलको सम्बन्धमा के गर्ला भन्नेमा केन्द्रीत थियो । तर, अख्तियारले बुधबार दायर गरेको मुद्दामा सर्वोच्च अदालतका बहालवाला न्यायाधीश कुमार रेग्मी र नेकपाका महासचिव विष्णु पौडेलका छोरा नवीन पौडेलमाथि प्रतिवादी बनाएर मुद्दा नै चलाएन ।

अन्य सबैजसो व्यक्ति प्रतिवादीका रुपमा प्रस्तुत गरिँदा आखिर कुमार रेग्मी र नवीन पौडेललाई किन बचाइयो त ?

अधिकांश नागरिकको साझा प्रश्न र आशंका हो यो । अहिले नेकपाकै सरकार बहुमतमा रहेको छ र कुमार रेग्मी सर्वोच्च अदालतमा बहाल छन् । त्यसैकारण सत्ता र शक्तिकै कारण नवीन पौडेल र कुमार रेग्मीमाथि मुद्दा नचलाइएको आशंका गर्न थालिएको छ ।

यता अख्तियारले मुद्दा दायर गर्दैगर्दा ६५ जना व्यक्तिलाई जग्गा जफत गर्ने प्रयोजनका लागि प्रतिवादी बनाउँदा पनि रेग्मी र पौडेललाई भने छुट दिइयो । उनीहरुले जग्गा फिर्ता गर्नेगरी अख्तियारका अनुसन्धान अधिकारीसमक्ष बयान गरेको र लिखित निवेदन नै दिएको भन्दै उनीहरुमाथि मुद्दा नचलाइएको अख्तियारको ‘टिप्पणी’मा उल्लेख छ ।