‘कोरोना समस्या मात्र होइन समाज परिवर्तनको सुनौलो अवसर पनि हो’

काठमाडौँ । एनएमबी बैङ्कका कार्यकारी निर्देशक (सीईओ) हुन् सुनिल केसी । केसीले राष्ट्रका प्रमुख ‘क’ वर्गका वाणिज्य बैङ्कहरु मध्येको एक बृहत् बैङ्क एनएमबीको नेतृत्व सम्हालिरहेका छन् । यद्यपि अहिलेको विषम परिस्थितिमा समेत उनले घरमै बसेर बैङ्कका सम्पूर्ण कार्यभार पूरा गरिरहेका छन् ।

यतिखेर विश्व कोरोना महामारीको चरम आक्रमणको सिकारमा छ । विश्वमा कोरोनाबाट सङ्क्रमित हुनेहरुको सङ्ख्या १० लाख नाघिसकेको छ भने कोरोनाबाटै मृत्यु हुनेहरुको सङ्ख्या आजको दिनसम्म ५० हजारभन्दा माथि पुगिसकेको छ ।

विश्वव्यापी बनेको कोरोना भाइरस तीव्र गतिमा फैलिरहँदा विश्वले आफ्नो देश र नागरिकको सुरक्षाका लागि भन्दै कोरोना रोकथाम तथा सुरक्षाका विभिन्न उपाय अपनाइरहेका छन् । सम्भावित दुर्घटनाबाट मुलुकलाई रोक्न अहिले धेरैजसो देशहरुले लकडाउनको रणनीति अपनाइरहेका छन् ।

यसैबीच ठ्याक्कै यतिखेर नेपालले पनि सम्भावित कोरोना महामारीको दुर्घटनाबाट मुलुकलाई बचाउन देश पूर्ण रूपमा लकडाउन गरेको छ ।

लकडाउनकै कारण यतिखेर सबै नागरिकहरु घरभित्रै थुनिन पुगेका छन् भने सधैँजसो व्यस्त र दौडधूप गर्ने कर्पोरेटकर्मीहरु समेत फुर्सदिला भएका छन् ।

कोरोनाले सधैँजसो व्यस्त र दौडधूपको जीवनबाट केही फुर्सदिलो र शान्त बन्न सिकाएको सीईओ केसी बताउँछन् ।

कोरोनाको विश्व महामारीका कारण आज धेरैजसो देशहरु लकडाउनमा छन् । धेरैको दैनिकी अस्तव्यस्त भएको छ । जसको सिकार आज हामी नेपाली पनि भएका छौँ । कोरोनाको सन्त्राससँगै बढेको जोखिमलाई न्यूनीकरण गर्न भन्दै नेपाल सरकारले घोषणा गरेको लकडाउनका कारण आज हामी घरघरमै थुनिन पुगेका छौँ । तर हामीले घरमै बसेर पनि समयको सदुपयोग गरिरहेका छौँ । अफिसियल कामबाहेक पनि अन्य नयाँ नयाँ खोज तथा अनुसन्धान र अध्ययनलाई समेत समय पाएका छौँ । त्यति मात्र होइन हामीलाई आफ्नो परिवारसँग रम्नसमेत कोरोनाले सिकाएको छ । त्यसैले कोरोनाले हामीलाई सधैँ काम काम भनेर दौडधूप मात्र होइन केही फुर्सदिलो र क्रिएटिभ हुन पनि सिकाएको छ ।