सरुवारोग अस्पतालको उदाहरणीय काम

काठमाडौं, भदौ १५ । अस्पतालहरुमा कोरोना संक्रमित र अरु बिरामीलाई सँगै राखेर उपचार गराउँदा पछिल्लो समय धेरै स्वास्थ्यकर्मी, चिकित्सक र नर्समा संक्रमण देखिएको छ । जसले अस्पतालको स्वास्थ्य सेवा सञ्चालनमा नै असर पुगेको छ ।

तर, गत चैत ४ गते दोस्रो संक्रमित भेटिएसँगै संक्रियरुपमा काम गरिरहेको टेकुस्थित शुक्रराज ट्रपिकल तथा सरुवारोग अस्पतालमा भने हालसम्म एकजना स्वास्थ्यकर्मीमा पनि संक्रमण देखिएको छैन । न त अस्पतालमा कुनै संक्रमितको मृत्यु नै भएको छ ।

कोरोना संक्रमणको दर बढ्दै गएसँगै ‘फ्रन्टलाइन’मा काम गर्ने स्वास्थ्यकर्मी बढी प्रभावित बन्न थालेका छन् ।

तर, हालसम्म ३०० संक्रमितको उपचार गरिसकेको शुक्रराज ट्रपिकल तथा सरुवारोग अस्पतालमा कार्यरत् कुनैपनि स्वास्थ्यकर्मी र कर्मचारीमा भने संक्रमण देखिएको छैन ।

पाँच महिनादेखि संक्रमितकोमात्र उपचार गराउँदै आएको अस्पतालले स्वास्थ्य सुरक्षाका उपायहरु अपनाएर उदाहरणीय काम गर्न सफल भएको छ ।

देशभरका ८० भन्दा बढी स्वास्थ्य संस्थामा कार्यरत् स्वास्थ्यकर्मीमा भने संक्रमण देखिएको छ ।

सरुवारोगकोमात्र उपचार गर्ने भएका कारण यस अस्पतालका चिकित्सक अझ बढी सचेत र जानकार देखिन्छन् ।

साथै, सुरक्षाका उपाय अपनाउनेबारे समय समयमा जानकारीसमेत गराउने गरेको अस्पतालका निर्देशक डा. सागरराज भण्डारी बताउनुहुन्छ ।

अस्पतालले हाल कोरोनाका बिरामीकोमात्र उपचार गर्ने गरेको छ ।

हाल ५० जना संक्रमितको उपचार गराइरहेको अस्पतालमा कोरोना परीक्षण गराउन दैनिकरुपमा आउने १५ देखि २० प्रतिशत व्यक्तिमा संक्रमण देखिएको डा. भण्डारी बताउनुहुन्छ ।

अस्पतालमा दिनहुँ करिब ३०० व्यक्ति परीक्षण गराउन आउने गरेका छन् ।

संक्रमितको संख्या बढिरहेको समयमा अग्रपंक्तिमा रहेर काम गर्ने सुरक्षाकर्मी पनि बढी जोखिममा छन् ।

सुरक्षाका उपाय अपनाउन विचार नपुर्‍याउने र हेलचेक्र्याइँ बढ्दै जाने हो भने संक्रमितको संख्या थप बढ्ने र यसको असर सम्पूर्ण स्वास्थ्य सेवामा समेत पर्नेछ । संक्रमितको संख्या बढ्दै गएको अहिलेको अवस्थामा यो थप चिन्ताको विषय पनि हो ।