दाङमा अवैध सुनसहित २ जना पक्राउ

घोराही । दाङ प्रहरीले घोराही बजारबाट सुनसहित २ जनालाई पक्राउ गरेको छ । जिल्ला प्रहरी कार्यालय दाङले २ सय ७३ ग्राम सुनसहित २ जनालाई बजारबाट समातेको जनाएको छ । जिल्ला प्रहरी प्रमुख एसपी गणेश चन्दले अबैध सुन लिएर बजारमा हिडिरहेको बिशेष सुराकीको आधारमा जिल्ला प्रहरी कार्यालय दाङबाट खटिएको टोलीले उनीहरुको साथबाट सुन बरामद गरेको जानकारी दिए ।

सुनसहित पक्राउ पर्नेमा घोराही१० नारायणपुरका पुर्णजङ्ग सुनार र घोराही कपासिका खड्ग प्रसाद सुनार रहेको एसपी चन्दले बताए । प्रहरीले घटनाको थप अनुसन्धान भइरहेको जनाएको छ । एसपी चन्दले घोराही बजारमा सुन लिएर हिडिरहेको प्रहरिले सुचना पाएपछि प्रहरीले पक्राउ गरेको र पक्राउ परेका सुन व्यवसायी भएको खुलेको बताए । काठमाडौंबाट दाङमा ल्याइ बिक्रि बितरण गर्ने गरि चोरीका किनेर वा भन्सार छलेर सुन ल्याएको हुन सक्ने प्रहरीको प्रारम्भिक अनुसन्धानबाट खुलेको उनले जानकारी दिए ।

साथै दाङ प्रहरीले पक्राउ परेका उनीहरुलाई थप अनुसन्धानसहित कारबाही गर्न राजस्व कार्यालय कोहलपुरलाई बुझाउने तयारी गरेको छ । यसअगाडि पनि प्रहरीले १ किलो सुनसहित बिभिन्न ब्यक्तिलाई पक्राउ गरेर कारबाहीका लागि राजस्व कार्यालय पठाएको थियो ।