कोरोना संक्रमित भएका बेला यात्रा गरेपछि सांसदलाई आजीवन जेल सजाय हुन सक्ने !

काठमाडौं। कोरोनाभाइरस संक्रमित भएका बेला ट्रेनमा ७ सय माइल यात्रा गरेकी बेलायती सांसदलाई जेल सजाय हुन सक्ने भएको छ । ६० वर्षकी बेलायती सांसद मार्गरेट फेरियरले आफू संक्रमित भएको पुष्टि भएपछि लण्डनदेखि स्कटल्याण्डसम्म ७ सय माइल ट्रेनमा यात्रा गरेकी थिइन् । उनलाई आज पक्राउ गरेर मुद्दा चलाइएको बेलायती अखबार द सनले जनाएको छ ।

फेरियरले आफू संक्रमित भएको पुष्टि भइसकेका बेला गएको सेप्टेम्बर २९ मा लण्डनदेखि ग्लासगोसम्मको यात्रा गरेकी थिइन् । गएको अक्टोबरमा पुलिस अधिकारीले उनीमाथि थप कारवाही नहुने किनकि उनले यात्रा गरेका बेला कोभिड–१९ प्रतिबन्धका नियमहरु लागू नभएको बताएका थिए । तर, आज पुलिसले उनलाई पक्राउ गरेर प्रतिबन्धसम्बन्धी नियमको उल्लंघन गरेको आरोपमा मुद्दा चलाएका छन् ।

यदि फेरियर दोषी ठहरिइन् भने उनलाई जेल सजाय हुन सक्छ । साथमा सांसदहरुले उनलाई पदबाट हटाउने र उनको स्थानमा अर्को निर्वाचन गराउन माग गर्ने अधिकार पाउँछन् । उनलाई लगाइएको अभियोगमा अधिकतम आजीवन कारावाससम्मको सजाय हुन सक्छ । पुलिस स्कटल्याण्डले फेरियरलाई पक्राउ गरेर मुद्दा चलाइएको पुष्टि गर्दै यसबारे अहिले नै थप जानकारी दिन नसकिने बताएको छ ।