प्रकाशित मिति : सोमवार, चैत्र ९, २०७७
अमेरिकाका पूर्व राष्ट्रपति डोनाल्ड ट्रम्प अब आफ्नै प्लेटफर्ममार्फत सामाजिक सञ्जालमा फर्किने भएका छन्।
उनका सल्लाहाकारले दिएको जानकारी अनुसार उनी आफ्नै सामाजिक सञ्जाल लिएर फर्किन लागेका हुन्।
‘मलाई लाग्छ कि, हामीले राष्ट्रपति ट्रम्पलाई सामाजिक सञ्जालमा दुई वा तीन महिनामा फर्किएको देख्नेछौं,’ सल्लाहकार जेसन मिलरले फक्स न्युजलाई भने।
उनका अनुसार त्यो प्लेटफर्म,’ सामाजिक सञ्जालकै सबैभन्दा हटेस्ट टिकट हुनेछ।’
मिलरका अनुसार यो मिडिया फरक खालको हुनेछ।
गत जनवरी ६ मा अमेरिकाको वासिङटन डिसीस्थित क्यापिटलमा भएको हिंसापछि ट्रम्पलाई फेसबुक, ट्विटर र स्नापच्याटले निलम्बन गरेको थियो। यस्तै युट्यूवले पनि ट्रम्पमाथि प्रतिवन्ध लगाएको थियो।
सो हिंसा ट्रम्पका समर्थकहरूले गरेका थिए जसमा प्रहरीसहित ५ जनाले ज्यान गुमाएका थिए।
त्यसको केहीदिनपछि ट्विटरले ट्रम्पको @realdonaldtrump नामको आइडी स्थायीरूपमा बन्द गरेको हो।
ट्रम्पले ट्विटर १० वर्ष देखि प्रयोग गर्थे। उनले आफ्ना समर्थकहरूसँग प्रत्यक्ष कुराकानी गर्न ट्विटर प्रयोग गर्थे।
ट्रम्प कुन प्लेटफर्मबाट आउन लागेका हुन् भन्ने खुलेको छैन। उनका सल्लाहकारले यसबारेमा थप कुरा नखुलाएको बिबिसीले जनाएको छ।
‘राष्ट्रपति ट्रम्पले के गर्छन् भनेर सबैजनाले पर्खिनेछन् र हेर्नेछन्,’ मिलरले भने।
मिलरका अनुसार यसबारेमा फ्लोरिडाको मार-ए-लागो रिसोर्टमा विभिन्न टिमसँग मिटिङहरू भएका छन्।
‘असंख्य कम्पनी’हरूले आफ्नो सामाजिक सञ्जाल चलाउन ट्रम्पलाई आग्रह समेत गरेको मिलरले बताए।
‘यो प्लेटफर्म ठूलो हुनेवाला छ,’ उनले ट्रम्पका समर्थकहरू त्यस मिडियामा आउने दाबी गर्दै भने, ‘करोडौं मानिसहरू आउनेछन्।’
© copyright 2016-2019 and all right reserved to jaljalakhabar | Site By : sobij
