उहाँ हाम्रो उम्मेदवार होइन, त्यसैले भोट हाल्छौं भनेर वचन दिने कुरै भएनः नेपाल पक्ष

काठमाडौं । गृहमन्त्री रामबहादुर थापा बादलले राष्ट्रिय सभाका निर्वाचनका लागि एमाले वरिष्ठ नेता माधव कुमार नेपालसँग नेपाल निवास कोटेश्वर पुगेर सहयोग मागेका छन् ।

मंगलबार बादल नेता नेपालसँग नेपाल निवास कोटेश्वर पुगेर सहयोग मागेका हुन् । बादलले सहयोग मागे पनि नेपालले भने कुनै जवाफ दिएका छैनन् ।

जेठ ६ गते राष्ट्रिय सभाको उपनिर्वाचन हुँदैछ । २०७४ मा एमाले–माओवादी गठबन्धनबाट निर्वाचन लडेका बादलको कार्यकाल ६ वर्षको थियो । २०७७ फागुन २३ गते सर्वोच्च अदालतले एमाले–माओवादी एकता भंग गरिदिएसँगै बादल एमाले प्रवेश गरेका हुन् ।

बादल एमाले बनेपछि उनको पूर्व पार्टी माओवादीले कारबाही गरेको हो । अहिले बादल एमालेको तर्फबाट उम्मेदवार बनेका छन् भने विपक्षी (कांग्रेसमाओवादी) गठबन्धनको तर्फबाट खिमलाल देवकोटा उम्मेदवार बनेका छन् । एमाले पृष्ठभूमिका देवकोटालाई माधव नेपाल पक्षको समर्थन छ ।