प्रकाशित मिति : बुधबार, साउन १३, २०७८
काठमाडौं । सभामुख हुदा संघीय संसद सचिवालयको एक कर्मचारीलाई बलात्कारको प्रयास गरेको आरोप लागेका कृष्णबहादुर महरालाई आरोपबाट सफाई दिने भनी जिल्ला अदालत काठमाण्डौंले गरेको निर्णयलाई उच्च अदालत पाटनले पनि सदर गरेको छ ।
न्यायाधीशहरु माधवप्रसाद पोखरेल र विमल सुवेदीको इजलासले जिल्ला अदालतको फैसला सदर हुने आदेश गरेको हो । फैसलाको पूर्णपाठ तयार नभएकाले के कस्तो आधारमा उनका वारेमा अदालतले निर्णय गर्यो भन्नेबारे खुलेको छैन ।
महराको चस्माको टुक्रा र खुट्टा ‘नया“ बानेश्वर २६’को कोठामा छुटेको भन्दै प्रहरीले बरामदी मुचुल्का तयार पारेको थियो । यही आधारमा महराविरुद्ध जिल्ला अदालत काठमाण्डौंमा मुद्दा चलेको थियो । पछि पिडित भनिएकी ‘नया“ बानेश्वर २६’ले आफूमाथि कुनै दुर्व्यवहार नभएको बयान दिएकी थिइन ।
जिल्ला अदालत काठमाण्डौंले २०७६ साल फागुन ५ गते महरालाई सफाई दियो । आफूमाथि दुव्र्यवहार नभएको भन्ने पिडितको बकपत्र, बलात्कारको प्रयास नगरेको भन्ने महराको बयान र हस्तरेखा विश्लेषणका क्रममा पिडितको निवासमा भेटिएका सामानहरु महराले नै छाडेका हुन् भन्ने पुष्टि नभएको भन्ने विशेषज्ञको रायका आधारमा जिल्ला अदालतले सफाई दिएको थियो ।
त्यो फैसलामा चित्त नबुझाई सरकारी वकिलको कार्यालयले उच्च अदालत पाटनमा पुनरावेदन दिएको थियो । त्यही मुद्दाको फैसलामा पाटनले पनि जिल्लाको फैसला सदर गरेको हो । आरोपपछि महराले पदबाट राजिनामा दिएका थिए ।
© copyright 2016-2019 and all right reserved to jaljalakhabar | Site By : sobij
