दुई पत्नीको सहमतिमा यसरी भयो पतिको भागबण्डा

प्रकाशित मिति : मङ्लबार, चैत्र १५, २०७८

पारिवारिक विवाद वा अंशबण्डामा जग्गा जमिन, घर तथा अन्य धन सम्पत्तिको भागबण्डा हुनु त सामान्य हो । तर छिमेकी मुलुक भारतमा भने दुईजना पत्नीहरू बीच एक लोग्नेको भागबण्डा भएको छ ।

बिहारको पूर्णिया जिल्लामा पर्ने एक गाउँमा दुईजना पत्नीहरूले आपसी सहमतिमा एक पतिलाई आपसमा भागबण्डा गरेका हुन्।

प्रहरी परिवार परामर्श केन्द्रको उक्त निर्णयप्रति दुवै पत्नी र पतिले सहमति जनाए र कानुनी कागज पनि गरियो ।

भारतीय पत्रिका दैनिक जागरणको रिपोर्ट अनुसार पूर्णिया प्रहरी परामर्श केन्द्रमा एकजना पुरुषको आफ्ना दुई पत्नीबीचमा भागबण्डा गर्ने सहमति भएको हो । उक्त भागबण्डाको सहमति अनुसार अब ती पुरुष महिनाको १५ दिन एकजना पत्नीसँग र अर्को १५ दिन अर्की पत्नीसँग बस्नेछन् ।

प्रहरी परिवार परामर्श केन्द्रको निर्देशनमा तिनजना पतिपत्नीबीच यस्तो समझदारी भएको छ ।

समाचार अनुसार स्थानीय गोडियारी गाउँमा बस्ने एकजना महिला आफ्नो लोग्नेविरुद्ध उजुरु लिएर पुलिस चौकी पुगेकी थिइन्। आफ्नो लोग्ने पहिले नै विवाहित रहेको र आफूलाई अविवाहित रहेको भनी ढाँटेर बिहे गरेको उनको गुनासो थियो । बिहे गरेपछि पतिले आफूलाई सँगै राख्न नचाहेको र पहिलो श्रीमतीसँगै बस्ने गरेको भन्दै उनले प्रहरीसमक्ष न्यायको लागि गुहार मागिन् ।

त्यसपछि प्रहरीले ती महिलाको लोग्ने तथा अर्की पत्नीलाई पनि चौकीमा बोलायो । दुवै पत्नीको कुरा सुनिसकेपछि प्रहरी असमन्जसमा पर्यो । र अन्ततः लोग्नेचाहिं दुवै पत्नीसँग बस्नुपर्ने र दुईजनाकै भरणपोषण गर्नुपर्ने निर्णय गर्‍यो । साथै उनले दुई पत्नीलाई अलग अलग घरमा राख्नुपर्ने र महिनाको १५ दिन पहिलो पत्नीसँग तथा अर्को १५ दिन दोस्रो पत्नीसँग बस्नुपर्ने निर्णय पनि प्रहरीले गरेको छ ।