ओखलढुङ्गामा जिप दुर्घटना, दुई प्रहरीको मृत्यु

काठमाडौं । ओखलढुङ्गाको बान्द्रेभीरमा प्रहरी चढेको जिप दुर्घटना हुँदा दुई जनाको मृत्यु भएको छ ।

मानेभन्ज्याङ गाउँपालिकाको बान्द्रेभीरमा भएको दुर्घटनामा ७ जना घाइते भएका छन् । मृत्यु हुनेमा प्रहरी हवल्दार भूपेन्द्र कार्की र प्रहरी जवान मनिष राजवंशी रहेका छन् ।

घाइते ७ मध्ये चारजनाको अवस्था गम्भीर रहेको प्रहरीले जनाएको छ । सोलुखुम्बुबाट विराटनगर हिँडेको प्रहरीको जिप दुर्घटनामा परेको हो ।

गम्भीर घाइतेहरुलाई उपचारका लागि हेलिकोप्टरमार्फत काठमाडौं ल्याउने तयारी भइरहेको प्रहरीले जनाएको छ । प्रहरीहरू हतियार मर्मतका लागि हिँडेका थिए ।

घाइते हुनेमा प्रहरी निरीक्षक ऋषिराज ढकाल, प्रहरी वरिष्ठ नायब निरीक्षक धनराज खतिवडा, प्रहरी सहायक निरीक्षक नवराज दाहाल, प्रहरी वरिष्ठ हवल्दार विशाल श्रेष्ठ, भूपेन्द्र खनाल, जवान रूपक विष्ट र चालक लीलाप्रसाद खनाल छन् ।