चुनावको मुखमा राजधानीमा फोहोर थुप्रियो

काठमाडौं । पुराना जनप्रतिनिधि निवर्तमान, नयाँ नचुनिएको स्थितिमा स्थानीय निकाय यतिबेला कर्मचारीको भरमा चलिरहेका छन् । चुनावमा उठेका उम्मेद्वारहरुले काठमाडौं उपत्यकाको फोहोर व्यवस्थापन पहिलो एजेण्डा बनाइरहँदा सार्वजनिक ठाउँमा फोहोरको थुप्रो लाग्ने क्रम बढेको छ । गर्मी याममा जताततै फोहोरको डुँगुरले रोगको त्रास बढाएको छ ।

जनप्रतिनिधिले गर्ने कामको चाप यतिबेला कर्मचारीमाथि परेको छ । विकासका बाहेक प्रशासनिक काम स्थानीय निकायबाट सम्पन्न भइरहेका छन् । सेवा लिन आउने सेवाग्राहीको पनि बाक्लै उपस्थिति देखिन्छ । पदाधिकारी हुँदा सबै काम बाँडफाँड हुँदा सजिलो हुने गरेको तर अहिले आफूहरुले मात्र गर्दा कामको भार थपिएको कर्मचारीको अनुभव छ । यद्यपी स्थानीय निकायले दिने सेवामा कुनै बाधा नपर्ने कर्मचारी बताउँछन् ।

चुनावको समयमा फोहोरको डुंगुरले जनजीवन आक्रान्त पारेको छ । हप्तौंदेखि फोहोर उठेको छैन । अझ वर्षाले थुपारेकै ठाउँमा कुहिन थालेपछि पदयात्रीको बेहाल भएको छ । राजधानी दुर्गन्धित हुँदा स्थानीय आक्रोसित छन् ।

चुनावी राजनीतिभित्र फोहोरको राजनीति कसरी घुस्यो त ? ल्याण्ड्फिल्ड साइट पुग्ने बाटोमा स्थानीयले विभिन्न माग राखी अवरोध गर्दा फोहर उठन नसकेको महानगर बताउँछ । महानगरसँग सम्बन्धित माग पूरा गर्न आफूहरु तयार भएपनि कालोपत्रे (पीच) गर्ने काम आफ्नो कार्यक्षेत्रभित्र नरहेको महानगरपालिकाका सहायक प्रवक्ता महेश काफ्लेले जानकारी दिनुभयो ।

मागका विषयमा पटक पटक बैठक भइरहेको छ । केही माग सम्बोधन भएका छन् । तर ल्याण्डफिल्ड साईट प्रभावित क्षेत्रका बासिन्दाले मागमाथि माग थपेको महानगरको भनाई छ । फोहोरमा मोहर फलाउने नाराबाट सुरु भएको राजनीति अझैं गन्तव्य पाएको छैन । हुँदाहुँदा स्थानीय निकायका उम्मेद्वारसँग पनि यस विषयमा स्पष्ट योजना छैन् । यसले फोहोरको समस्या बारम्बार बल्झिरहने निश्चित छ ।