जेलबाटै रेशम चौधरीले तयार गरे पार्टी संचालन र कार्य विभाजन प्रस्ताव

नागरिक उन्मुक्ति पार्टीका संस्थापक रेशम चौधरीले पार्टी संचालन र कार्य विभाजन प्रस्ताव तयार परेका छन् । काठमाडौंको डिल्लीबजार कारागारमा जन्म कैदको सजाय भोगिरहेका चौधरीले तयार पारेको उक्त प्रस्ताव रातोपाटीलाई प्राप्त भएको छ । पार्टी संचालनका लागि पार्टी लेबी, क्रियाशील सदस्यता र कार्य विभाजनका सम्बन्धमा आगामी केन्द्रीय कमिटी बैठकबाट निर्णय लिन रेशमको निर्देशन छ ।

लेबी सम्बन्धमा प्रस्ताव

नागरिक उन्मुक्ति पार्टीको केन्द्रीय सदस्य हुन एक कार्यकालका लागि २५ हजार लेबी निर्धारण गरिएको छ । यस्तै क्रियाशील सदस्यका लागि एक वर्षमा २५०, साधारण सदस्यका लागि एक वर्षमा २५ रुपैयाँ लेबी निर्धारण गरिएको रेशमको प्रस्तावमा उल्लेख छ ।

नागरिक उन्मुक्ति पार्टीबाट निर्वाचित मेयरले मासिक तलबको १५, उपमेयरले १२, वडाध्यक्षले १० प्रतिशत लेबी बुझाउनुपर्ने छ भने वडा सदस्यले मासिक १ हजार रुपैयाँ तोकिएको छ ।

यस्तै जिल्ला समन्वय समितिका सभापतिले २० प्रतिशत र जिल्ला समन्वय समितिका सदस्यले १० प्रतिशत लेबी पार्टीलाई बुझाउनुपर्ने प्रस्तावमा भनिएको छ ।