भक्तपुरमा एक वृद्ध जलेको अवस्थामा मृत फेला

भक्तपुरमा एक जना वृद्ध जलेको अवस्थामा मृत फेला परेका छन्।

शनिबार बिहान सवा ८ बजे चाँगुनारायण नगरपालिका-२ दुवाकोट फक्सिङटार बस्ने ८४ वर्षीय जगतप्रसाद शिल्पकार मृत फेला परेको जिल्ला प्रहरी परिसर भक्तपुरका प्रहरी नायब उपरीक्षक राजु पाण्डेले जानकारी दिए।

उनी आफ्नै तीन तले पक्की घरको भुँई तलाको कोठामा मृत फेला परेका हुन्।

प्रहरी नायब उपरीक्षक पाण्डेका अनुसार मृतकको कम्मरदेखि माथिको भाग जलेको छ।

घटनाबारे खबर पाएपछि प्रहरी वृत्त थिमी, परिसर, काठमाडौं उपत्यका अपराध अनुसन्धान कार्यालयको टोली घटनास्थलमा पुगेको थियो।

प्रहरीले केएमसी अस्पतालबाट चिकित्सकको टोलीलाई पनि बोलाएको थियो।

अहिले पोष्टमार्टमका लागि शव केएमसी अस्पताल दुवाकोट पठाएको छ। मृतक शिल्पकारको घरमा उनका छोरा र बुहारी पनि बस्छन्।

उनीहरू माथिल्लो तलामा बस्थे।

बिहान छोराले मृत अवस्थामा देखेपछि प्रहरीलाई खबर गरिएको थियो। प्रहरीले घटना नियोजित हो वा दुर्घटना हो भन्ने पाटोबाट अनुसन्धान गरिरहेको छ। अहिले नै घटना शंकास्पद छ वा छैन भन्न नसकिने प्रहरी नायब उपरीक्षक पाण्डेले बताए।