पाकिस्तानी विदेशमन्त्रीले मोदीलाई ‘गुजरातको कसाई’ भनेपछि भाजपा आक्रोशित

काठमाडौं । पाकिस्तानका विदेशमन्त्री बिलावल भुट्टोले भारतका प्रधानमन्त्री नरेन्द्र मोदीलाई ‘गुजरातको कसाई’को संज्ञा दिएपछि भारतीय जनता पार्टी (भाजपा)ले भारतमा विरोध प्रदर्शन गर्ने भएको छ ।

बीबीसी हिन्दीका अनुसार शनिबार भारतका सबै प्रदेशमा भाजपाले प्रदर्शनको तयारी गरेको छ । भाजपा कार्यकर्ताले पाकिस्तानका विदेशमन्त्रीको पुत्ला दहन गर्दै उनको अभिव्यक्तिको कडा विरोध गरेका छन् ।

भुट्टोको अभिव्यक्तिप्रति आपत्ति जनाउँदै भाजपाले एक विज्ञप्ति जारी गर्दै भनेको छ, ‘पाकिस्तानका विदेशमन्त्रीको बयान पूर्णतया अपमानजनक र कायरताले भरिएको छ।’ भाजपाले सत्तामा बस्नका लागि मात्रै यस्तो अभिव्यक्ति दिएको भनेको छ ।

‘यो कथनको उद्देश्य विश्वलाई भ्रममा पार्नु र पाकिस्तानको खस्कँदै गएको अर्थतन्त्र, अराजकता, सेनामा मतभेद, बिग्रँदै गएको विश्वव्यापी सम्बन्ध र पाकिस्तान आतंकवादको गढ भएको कुराबाट विश्वको ध्यान हटाउनु हो,’ भाजपाले भनेको छ ।

पाकिस्तानका विदेशमन्त्री बिलावल भुट्टोले शुक्रबार संयुक्त राष्ट्र संघको एक कार्यक्रममा भनेका थिए, ‘ओसामा बिन लादेन मरेका छन् तर ‘गुजरातका कसाई’ जीवित छन्। र उनी भारतका प्रधानमन्त्री हुन्। उनी प्रधानमन्त्री नहुँदासम्म उनलाई अमेरिका आउन प्रतिबन्ध लगाइएको थियो ।’

भुट्टोको यो टिप्पणीको भारतमा चर्को विरोध भइरहेको छ । भारतीय विदेश मन्त्रालयका प्रवक्ता अरिन्दम बागचीले भने, ‘पाकिस्तानका अनुसार पनि यो भनाइ निकै तल्लो तहको हो । पाकिस्तानका अल्पसंख्यकहरूप्रतिको दृष्टिकोणमा खासै परिवर्तन आएको छैन। उनलाई भारतलाई दोष दिने अधिकार छैन ।’

शुक्रबार पनि भाजपा कार्यकर्ताले पाकिस्तान उच्चायोग अगाडि प्रदर्शन गरेका थिए । उनीहरुलाई रोक्न दिल्ली पुलिसले ब्यारिकेड लगाए तर अनियन्त्रित भीडले ब्यारिकेड पनि तोडिदिए। भिड नियन्त्रण गर्न दिल्ली पुलिसले भाजपाका धेरै कार्यकर्तालाई हिरासतमा लिएको थियो।

बिहीबार, भारतका विदेशमन्त्री एस जयशंकरले संयुक्त राष्ट्र सुरक्षा परिषदको ब्रीफिंगमा पाकिस्तानलाई आतंकवादको केन्द्रबिन्दुको रूपमा वर्णन गरेका थिए । जवाफमा बिलावलले पीएम मोदीलाई लिएर यो विवादास्पद बयान दिए हुन् ।