बालकृष्णले विराटनगर ल्याएका अभिषेक गिरीलाई रविले भीमफेदी कारागार पठाए

विराटनगर । राजनीतिक पहुँचका आधारमा जिल्ला कारागार मोरङ आएका कैदी अभिषेक गिरीलाई मकवानपुरको भिमफेदी कारागार सारिने भएको छ ।

डिल्लीबजार कारागारबाट २०७८ मंसिर ९ गते मोरङ ल्याइएका गिरीलाई मोरङ कारागार हाजिर भएलगतै चौकीदारको जिम्मेवारी दिइएको थियो । आइतबार गिरीलाई मकवानपुरको भीमफेदी कारागार स्थानान्तरणको पत्र मोरङ आएको हो ।

अपहरण तथा शरीर बन्धक मुद्दामा कैद सजाय भुक्तान गरिरहेका उनको कैद भुक्तान अवधि एक महिना मात्रै बाँकी छ । एक महिना कैद बाँकी रहेको अवस्थामा भिमफेदी कारागार स्थानान्तरणको पत्र आएको जिल्ला कारागार मोरङका नित्तिम जेलर तुलसीराम भगतले बताए । ‘उहाँको स्थानान्तरणको पत्र मेलमा आएको छ,’ उनले भने,‘ हामी प्रकृयामा लैजान्छौं ।’

तत्कालिन गृहमन्त्री खाडको निर्देशनमा २०७८ मंसिर ९ गते गिरीलाई मोरङ कारागार ल्याइएको थियो । उनलाई मोरङ ल्याउने निर्णयको विरोधमा कारागारभित्र आन्दोलन भएको थियो । गिरीलाई मोरङ ल्याउनकै लागि तीन जना चौकीदारलाई मोरङबाट अन्यत्र पठाइएको थियो ।

गिरीलाई ल्याउन भन्दै २०७८ असोज १८ गते तत्कालिन चौकीदार नवीन राईलाई झुम्का कारागार सारिएको थियो । राईको सरुवापछि किरण गुरुङले कामचलाउ चौकीदारको जिम्मेवारी पाएका थिए । २०७८ कात्तिक २४ गते मोरङ कारागारमा गिरीकै कारण झडप हुँदा गुरुङसहित ६ जना कैदीबन्दी घाइते भएका थिए ।

झडपपछि गुरुङसहित ६ जनालाई झापा र इलाम सरुवा गरिएको थियो । गत मंसिर ९ गते गिरी आउनुअघि तत्कालिन चौकीदार कात्तिक कामत र सिटी नाइके युवराज परियारलाई सिन्धुली कारागार सरुवा गरिएको थियो ।