तिलगंगा आँखा उपचार केन्द्र र राप्ती गाउँपालिकाको सहकार्यमा २४९ जनाको नि:शुल्क शल्यक्रिया,गाउँपालिकामा तिलगंगा आँखा उपचार केन्द्रको सेवा सुरु

बिनिता शर्मा,काठमाडौं। काठमाडौंको तिलगंगा आँखा प्रतिष्ठानसँगको सहकार्यमा दाङको राप्ती गाउँपालिकामा स्थापना गरिएको आँखा उपचार केन्द्र सन्चालनमा आएको छ । राप्ती गाउँपालिकाको सिसहनियाँमा स्थापना गरिएको ‘तिलगंगा सर्जिकल आँखा केन्द्र’ले मोतीबिन्दुको निःशुल्क सल्यक्रिया गरेर सेवा सुरु गरेको हो ।

दाङको राप्ती गाउँपालिकामा तिलगंगा आँखा प्रतिष्ठानको सहयोगमा आँखा उपचार केन्द्र स्थापना गर्ने सम्झौता गत कात्तिक १६ गते भएको थियो । सम्झौता पत्रमा तिलगंगा आँखा प्रतिष्ठानको कार्यकारी निर्देशक एवम् वरिष्ठ आँखा रोग विशेषज्ञ डा. रिता गुरुङ र राप्ती गाउँपालिकाका अध्यक्ष प्रकाश विष्टले हस्ताक्षर गरेका थिए । सोही सम्झौता अनुसार राप्ती गाउँपालिकाको सिसहनियाँ स्वास्थ्य चौकी रहेको स्थानमा आँखा उपचार केन्द्र सन्चालनमा ल्याइएको हो ।

‘आँखाका बिरामीहरुको अपरेसनबाटै हामीले सेवा सुरु गरेका छौं,’ गाउँपालिका प्रमुख प्रशासकिय अधिकृत नेब बहादुर ओलीले भने, ‘त्यसअघि राप्ती गाउँपालिकाका नौ वटै वडा र छिमेकी गढवा गाउँपालिकामा पनि शिविर सन्चालन गरेर स्क्रिनिङ गरेका थियौं ।’

आँखा शिविरबाट २ हजार २८० जनाले सेवा लिएकामध्ये २०,२१ र २२ गते तीन दिन संचालन भएको शिबिरमा २४६ जना मोती बिन्दुको अप्रेसन गरिएको छ भने २ ओटा मासु पलाएको अप्रेसन भएको छ भने एकजनाको सामान्य सल्यकृया गरिएको तिलगंगा आँखा प्रतिष्ठानका डाक्टर होम बहादुर गुरुङ्ले जानकारी दिनु भएको छ ।

आँखा उपचार केन्द्रबाट राप्ती गाउँपालिकाका साथै छिमेकी गढवा गाउँपालिका र लमही नगरपालिकाका बासिन्दाले समेत सेवा लिएको गाउँपालिका प्रमुख प्रशासकिय अधिकृत ओलीले भने,

अस्पतालका लागि गाउँपालिकाले भवन र जग्गा उपलब्ध गराएको छ भने तिलगंगा आँखा प्रतिष्ठानले उपचारका लागि आवश्यक उपकरण र प्राविधिक जनशक्ति उपलब्ध गराएको छ । एक वर्षसम्म प्रतिष्ठानले आफ्नै जनशक्तिबाट सेवा दिनेछ र उनीहरुलाई तलबसमेत खुवाउने छ । एक वर्षपछि भने आँखा उपचार केन्द्रमा प्रयोग भएको उपकरण पालिकालाई नै हस्तान्तरण गर्ने छ । साथै त्यहाँको जनशक्ति व्यवस्थापन, उनीहरुको पारिश्रमिक लगायत सबै जिम्मा पालिकाको हुने सम्झौता पत्रमा उल्लेख छ । सम्झौतामा लेखिएअनुसार आँखा सम्बन्धी प्रवर्द्धनात्मक, प्रतिरोधात्मक र अनुसन्धानमुलक कार्यक्रम पनि सन्चालन हुने छ ।

तिलगंगा आँखा प्रतिष्ठानले स्थानीय पालिकाहरुसँगको सहकार्यमा विभिन्न पालिकामा आँखा उपचार केन्द्र स्थापना गर्दै आएको छ । यस्ता उपचार केन्द्र देशका विभिन्न ३२ स्थानमा खोलिसकिएको तिलगंगा आँखा प्रतिष्ठानकाडाक्टर होम बहादुर गुरुङ्ले जानकारी दिनु भयो।